Chempıondar Lıgasyna shyqqan komandalardyń tizimin oıyn aldynda ilip qoıdyq — «Qaırat» bapkeri
ALMATY. KAZINFORM — «Qaırat» óz alańynda «Seltıkti» penaltı arqyly jeńip, ÝEFA Chempıondar lıgasynyń toptyq kezeńine ótti.

Oıynnan keıin ótken baspasóz máslıhatynda BAQ ókilderi Rafael Ýrazbahtındi onyń atyn urandata qarsy aldy. Alaıda «Qaırattyń» bas bapkeri ózin emes, almatylyq ujymnyń atyn uran etýge shaqyrdy.
— Biz mereke syılaı alǵanymyzǵa qýanyshtymyz. Biraq bul jeńis tek meniń eńbegim emes, klýbymyzda jumys isteıtin barlyq qyzmetkerdiń eńbegi. Sondyqtan «Qaırat» dep urandataıyq, — dedi ol.
Ýrazbahtın penaltı kezeńinde qarsylastyń 3 soqqysyn qaıtaryp, óz komandasyna jeńis syılaǵan qaqpashy Temirlan Anarbekov týraly da pikir bildirdi.
— Qaqpashylar boıynsha men qaqpashylardyń bapkerine senim artamyn. Slovakııada bolǵanda ol Zarýtskııdi qaldyrýdy usyndy. Al osy oıyn aldynda sóıleskenimde Temirlan qaqpada jaqsy turatynyn senimdi aıtty. Búgin qansha sátte bizdi Temirlan qutqaryp qaldy. Bul kezdeısoqtyq emes, — dedi bapker.
Sonymen qatar «Qaırattyń» bas bapkeri Chempıondar lıgasynyń toptyq kezeńine baılanysty boljam jasaýdan bas tartty. Alaıda oıynǵa deıingi daıyndyqta qandaı ádis-tásil qoldanǵanyn aıtty.
— Qazir Chempıondar lıgasyna shyqqan komandalardy qarasaq, bári — top klýb. Biz bul tizimdi shyǵaryp, kıim aýystyrý bólmesinde ilip qoıdyq. Bul meniń sheshimim boldy. Jigitter bul komandalardy kórgenin qaladym. Endi aldaǵy qarsylastarymyz meılinshe dańqty komandalar bolǵanyn tileımiz. Biz ǵana oınap qoımaı, jankúıerlerimiz tamashalaı alǵanyn qalaımyz, — dedi Rafael Ýrazbahtın.
Bapker «Qaırat» klýbynyń maqsattarynyń biri oryndalǵanymen, bıyl el birinshiligindegi chempıondyqqa talastan bas tartpaıtynyn atap ótti. Sondaı-aq ol BAQ ókilderiniń suraqtaryna jaýap bere otyryp, komandanyń deńgeıin odan ári damytý úshin ne isteýge bolatynyn aıtty.
— Biz el chempıonatynyń deńgeıin kóterýimiz kerek. Infraqurylymdy damytyp, alańdardyń kúıin jaqsartýymyz qajet. Sonda bizdiń komandanyń da deńgeıi kóteriledi, eýrokýboktarda oınaý jeńildeıdi. Oǵan bizdiń nátıjemiz áser etedi dep úmittenemiz, — dedi Rafael Ýrazbahtın.
Eske salaıyq, «Qaırat» fýtboldan Chempıondar lıgasynyń negizgi kezeńine joldama aldy.