Chempıondar lıgasy: «Sportıng» - «Qaırat» kezdesýinde kim tóreshilik qyzmet atqarady

ASTANA. KAZINFORM - Fýtboldan UEFA Chempıondar lıgasy negizgi kezeńindegi «Sportıng» (Portýgalııa) pen «Qaırat» kezdesýinde qaı eldiń tóreshiler qyzmeti atqaratyny belgili boldy.

Bas tóreshi mindeti polshalyq Damıan Sılvestjakqa júktelgen. Oǵan otandastary Pavel Sokolnıtskı men Adam Karasevıch kómekshilik jasaıdy. Tórtinshi tóreshi de sol eldiń ókili Martsın Kohanek.

Aıa ketsek, kezdesý 18 qyrkúıekten 19-na qaraǵan túni Qazaqstan ýaqytymen saǵat 00:00-de Portýgalııa astanasy Lıssabon qalasyndaǵy «Joze Alvalade» stadıonynda ótkiziledi.

Almatylyq klýb bedeldi týrnırde «Real Madrıd» (Ispanııa), «Inter» (Italııa), «Arsenal» (Anglııa), «Brıýgge» (Belgııa), «Sportıng» (Portýgalııa), «Olımpıakos» (Grekııa), «Pafos» (Kıpr), «Kopengagen» (Danııa) klýbtarymen oınaıdy.

Elimizdiń atynan atalǵan týrnırde almatylyq «Qaırat» synǵa túsip jatyr. Qazaqstandyq komanda dop dodasynda barlyǵy 8 oıyn ótkizedi. Onyń 4-eýi óz alańynda bolsa, 4-eýi syrt alańǵa josparlanǵan.

Negizgi kezeńde barlyǵy 36 komanda synǵa túsedi. Birinshi týr bıyl 16 qyrkúıekte bastalsa, segizinshi týr 2026 jyldyń 28 qańtarynda bolady. Al pleı-off 16-18 aqpan, 1/8 fınal 10-11 naýryz, ¼ fınal 7-8 sáýir, ½ fınal 28-29 sáýir, fınal 30 mamyrǵa belgilengen.