Chempıondar lıgasy: «Seltık» pen «Qaırat» kezdesýi qashan bastalady

ASTANA. KAZINFORM — Fýtboldan UEFA Chempıondar lıgasy pleı-off kezeńinde almatylyq «Qaırat» pen Shotlandııanyń «Seltık» komandasy arasyndaǵy kezdesýdiń qashan bastalatyny belgili boldy.

Bul kezdesý 20 tamyzdan 21-ne qaraǵan túni saǵat 00:00–de bastalyp, «Qazsport» telearnasynan tikeleı efırde kórsetiledi.

Almatylyq fýtbolshylar atalǵan týrnırdiń alǵashqy úsh irikteý kezeńinde Slovenııanyń «Olımpııa» (1:1, 2:0), Fınlıandııanyń KýPS klýbtaryn (0:2, 3:0), Slovakııanyń «Slovan» (1:0, 0:1, penaltıden 4:3) qapy qaldyryp ketti.

Al «Seltık» eýrododadaǵy alǵashqy oıynyn pleı-off kezeńinen bastaıdy.
Shotlandııalyq klýb 1887 jyly qurylǵan. Sodan bergi kezeńde óz elinde 55 márte chempıon atanyp, 42 márte Shotlandııa kýbogyna ıe boldy. 1967 jyly Eýropa chempıondar kýbogyn tóbesine kóterdi.

Qazirge deıin eýrokýbok oıyndarynda qazaqstandyq klýbtarmen úsh márte joly túıisti. 
Aldymen 2013 jyly Chempıondar lıgasy pleı-off kezeńinde qaraǵandylyq «Shahterdi» (0:2, 3:0) orta jolda qaldyryp, toptyq kezeńge joldama aldy.

Al elordalyq «Astanany»2016 jyly Chempıondar lıgasy úshinshi irikteý kezeńinde (1:1, 2:1), 2017 jyly pleı-off kezeńinde (5:0, 3:4) esebimen qapy qaldyrdy.

Qazirge deıin almatylyq klýb Chempıondar lıgasynda úshinshi márte baq synaıdy. Alǵashqy ekeýinde birinshi jáne ekinshi kezeńinde jarysty aıaqtady. 

Al Eýropa lıgasynda 10 márte baq synap, 2016 jyly pleı-off satysyna deıin jetti.
Sondaı-aq eki márte Konferentsııa lıgasynda synǵa túsken olar 2021 jyly toptyq kezeńde el namysyn qorǵady.