Chempıondar lıgasy: «Palma» úshinshi jyl qatarynan jeńimpaz boldy

ASTANA. KAZINFORM - Ispanııanyń «Palma» komandasy fýtzaldan Chempıondar lıgasy fınalynda  qazaqstandyq «Qaırattan» basym túsip, chempıondyq ataqqa qol jetkizdi.

Oıynnyń 6-mınýtynda olardyń qatarynan Hesýs Gordılo mergendik tanytsa, oǵan 8-mınýtta «Qaırat» sapynan Kaıo Rýıs bir golmen jaýap qaıyrdy.

Odan keıin «Palma» sapynan Lýkas Mashado 18, Marıo Ravılos 19-mınýtta mergendik tanytty.

Ekinshi kezeńde ıspanııalyq komandadan Fabıno 23, 27, 28, 31, Netıno 32, Mateýs Maııa 37-mınýtta gol soqsa, «Qaırat» quramynan Dáýren Tursaǵulov 33, Jahangır Rashıt 35, Kevın Arreta 39-mınýtta kózdegen nysanadan múlt ketken joq.

Nátıjesinde almatylyq klýb qarsylasyna 4:9 esebimen jeńilip qaldy.

Osylaısha «Palma» atalǵan týrnırde qatarynan úshinshi márte chempıondyq tuǵyrǵa kóterildi. Olar budan buryn 2022/23, 2023/24 jyldary jeńimpaz bolǵan edi.

Al «Qaırat» 2012/13, 2014/15 jylǵy maýsymda Chempıondar lıgasynda bas júldege ıe boldy.

Aıta ketsek, 3-oryn úshin oıynda Portýgalııanyń «Sportıng» klýbyn 3:2 esebimen jeńgen Ispanııanyń «Kartahena» komandasy qola medal aldy.

Bas bapker Marlon Velasko atalǵan týrnırde «Qaırat» sapynda tómendegi shákirtterine senim artty. Qaqpa Dennıs pen Narýn Serikovke senip tapsyrylǵan. Al oıynshylar qatarynda Arnold Knaýb, Edson, Jahangır Rashıt, Dener, Zanotto, Dáýren Tursaǵulov, Birjan Orazov, Kaıo Rýız, Otanıa, Kevın Arrıeta, Gege, Vendel da Sılva Mendes, Alısson bar.