Chempıondar lıgasy: «Qaırattyń» aldaǵy qarsylasy — «Arsenal» jaıly ne bilemiz

ASTANA. KAZINFORM — Kazinform tilshisi almatylyq «Qaırat» UEFA Chempıondar lıgasy negizgi kezeńi segizinshi týrynda oınaıtyn Anglııanyń «Arsenal» (London) komandasy jaıynda jan-jaqty tarazylap kórdi. 

Londondyq klýb álemdegi bedeldi ujymdardyń biri retinde baǵalanady. Komandanyń tarıhy tym tereńde jatyr. Bıyl «Arsenaldyń» qurylǵanyna qazan aıynda 140 jyl tolady. 1886 jyldan beri komanda 13 márte Anglııa chempıony ataǵyn jeńip aldy. Oǵan qosa 14 márte Anglııa kýbogyn tóbesine kóterse, 17 márte Anglııa sýperkýbogyna ıe boldy. Eýropa kýbok ıeleri jáne Jármeńke kýboktarynda bir-bir márte jeńimpaz tuǵyryna kóterildi.

Jankúıerler frantsııalyq belgili maman Arsen Venger komandaǵa jetekshilik etken 1996-2018 jyldardaǵy kezeńdi jaqsy biledi. Onyń basshylyǵymen komanda birneshe márte chempıondyq ataqqa ıe bolsa, únemi úzdikter qatarynan kórindi.

2019 jyldan beri «Arsenal» tizginin ıspanııalyq maman Mıkel Arteta qolǵa ustady. Bul kezeńde komanda Anglııa Premer-lıgasynda ortanqol ujymdar qatarynda júrgen edi. Alǵashqy jyldary londondyq klýb segizinshi oryndy mise tutty. Sol kezeńde Anglııa kýbogynda olar «Chelsıdi» jeńip, jankúıerler aldynda bedeli ósti. Odan keıingi eki jylda da komandanyń jaǵdaıy ońala qoıǵan joq. Al 2022/23 jylǵy maýsymda jeti jyldan keıin alǵash ret ekinshi orynǵa taban tiredi. Bul jetistigin keıingi eki jylda qaıtalady. Dese de ázirge Mıkel Artetanyń shákirtteri ázirge jeńimpaz tuǵyrynan kórine almaı keledi.

Bıyl «Arsenal» Anglııa Premer-lıgasynda birinshi orynda keledi. Komanda 23 týrdan keıin 50 upaı jınap, kósh tizginin eshkimge berer emes. Degenmen sońǵy úsh týrda jeńistiń kiltin taba almaı keledi. Eki márte teń túsip, bir márte jeńilistiń aşy dámin tatty. Saldarynan týrnır kestesinde ókshelep kele jatqan «Manchester Sıtı» men «Aston Vılla» qýyp jetýge jaqyn tur. Endi londondyq klýb úshin qatelesýge jol joq.

Sondaı-aq olar Chempıondar lıgasy negizgi kezeńinde birde-bir upaı joǵaltpady. Barlyq oıynda qarsylastaryn qapy qaldyrdy. Aǵylshyndyq komanda jarys barysynda Ispanııanyń «Atletık Bılbao» (2:0), Grekııanyń «Olımpıakos» (2:0), Ispanııanyń «Atletıko Madrıd» (4:0), Chehııanyń «Slavııa» (3:0), Germanııanyń «Bavarııa» (3:1), Belgııanyń «Brıýgge» (3:0), Italııanyń «Inter» (3:1) klýbtarynan basym tústi. Osylaısha olar birden atalǵan týrnırdiń 1/8 fınalyna joldama alyp úlgerdi.

Komandanyń negizgi stadıony «Emıreıts» stadıony 60 myńnan astam jankúıerdi emin-erkin syıdyra alady. UEFA-nyń tórtinshi sanatyna ıe bolǵan sporttyq keshen 2004 jyly paıdalanýǵa berilgen edi.

Anglııalyq klýb sapynda kóptegen belgili fýtbolshy bar. Olardyń birqatary óz elinde ulttyq qurama namysyn qorǵaıdy. Qaqpashy mindeti Davıd Raııa men Kepa Arrısabalagaǵa júktelgen.

Alǵashqy Ispanııa quramasynda oınasa, ekinshisi budan burynǵy jyldary sol qurama sapynda jasyl alańǵa shyqqan edi. Búginde Ispanııanyń jastar quramasynda oıyn kórsetip júrgen qorǵaýshy Krıstıan Moskera da ótken jyldan bastap «Arsenaldyń» jeıdesin kıdi.

Sondaı-aq Anglııa quramasynyń úzdikteri Býkaıo Saka segiz jyldan beri «Arsenaldan» aýysqan emes. Norvegııalyq fýtbolshy Martın Edegordyń da londondyq klýb sapynda júrgenine bıyl besinshi jylǵa jýyqtady. Kezinde Brazılııa ulttyq quramasynyń shabýyl shebin nyǵaıtqan Gabrıel Jezýs komanda quramyna 2022 jyly qosyldy. Sol eldiń ulttyq quramasynda oınaıtyn Gabrıel Martınellı «Arsenaldyń» shabýyl shebin nyǵaıtty. Shvetsııalyq Vıktor Dekeresh, ıspanııalyq Mıkel Merıno, Martın Sýbımendı, germanııalyq Kaı Haverts, anglııalyq Deklan Raıs londondyq klýbtyń jetistigine úles qosyp keledi.

Kezdesý 28 qańtardan 29-na qaraǵan túni saǵat 1:00–de Anglııa astanasy London qalasyndaǵy «Emıreıts» stadıonynda bastalyp, «Qazaqstan» telearnasynan tikeleı efırde kórsetiledi.

Bul mindetti shveıtsarııalyq kelgen Ýrs Shnıder bastaǵan tóreshiler brıgadasy atqaratyn bolady. Oǵan otandastary Marko Tsıýrher men Benıamın Tsıýrher kómektesedi. Tórtinshi tóreshi de sol eldiń ókili Sven Volfensberger.

Osyǵan deıin negizgi kezeńde «Qaırat» Portýgalııanyń «Sportıngine» 1:4, Ispanııanyń «Real Madrıdine» 0:5, Italııanyń «Interine» 1:2, Grekııanyń «Olımpıakosyna» 0:1, Danııanyń «Kopengagenine» 2:3, Belgııanyń «Brıýggesiine» 1:4 esebimen jol berse, Kıprdiń «Pafosymen» 0:0 esebimen teń tústi.

Aǵylshyndyq komanda jarys barysynda Ispanııanyń «Atletık Bılbao» (2:0), Grekııanyń «Olımpıakos» (2:0), Ispanııanyń «Atletıko Madrıd» (4:0), Chehııanyń «Slavııa» (3:0), Germanııanyń «Bavarııa» (3:1), Belgııanyń «Brıýgge» (3:0), Italııanyń «Inter» (3:1) klýbtarynan basym tústi.