Chempıondar lıgasy: «Qaıratpen» kezdesýge «Arsenal» sapynda kimder qatysa almaıdy

ASTANA. KAZINFORM — UEFA Chempıondar lıgasy negizgi kezeńi segizinshi týryndaǵy «Arsenal» (Anglııa) — «Qaırat» (Qazaqstan) kezdesýinde londondyq klýbtan kimderdiń alańǵa shyǵa almaıtyny belgili boldy.

Bul jóninde anglııalyq klýbtyń resmı saıtynda bas bapker Mıkel Arteta baspasóz máslıhatynda aıtqan pikiri jarııalandy. 

Jaraqatyna baılanysty qorǵaýshylar Ýılıam Salıba men ıÝrrıen Tımberdiń aldaǵy kezdesýge qatysýdan tys qalyp otyr. Olardyń ornyn qosalqy quramnan jas fýtbolshylar basýy yqtımal. 

Sondaı-aq erteń jankúıerler Mıkel Merıno men Deklan Raıstyń oıynyn tamashalaı almaıdy. Olar negizgi kezeńdegi jeti kezdesýde úsh márte sary qaǵaz alyp úlgergen edi. 

Kezdesý 28 qańtardan 29-na qaraǵan túni saǵat 1:00–de Anglııa astanasy London qalasyndaǵy «Emıreıts» stadıonynda bastalyp, «Qazaqstan» telearnasynan tikeleı efırde kórsetiledi.

Bul mindetti shveıtsarııalyq kelgen Ýrs Shnıder bastaǵan tóreshiler brıgadasy atqaratyn bolady. Oǵan otandastary Marko Tsıýrher men Benıamın Tsıýrher kómektesedi. Tórtinshi tóreshi de sol eldiń ókili Sven Volfensberger.

Osyǵan deıin negizgi kezeńde «Qaırat» Portýgalııanyń «Sportıngine» 1:4, Ispanııanyń «Real Madrıdine» 0:5, Italııanyń «Interine» 1:2, Grekııanyń «Olımpıakosyna» 0:1, Danııanyń «Kopengagenine» 2:3, Belgııanyń «Brıýggesine» 1:4 esebimen jol berse, Kıprdiń «Pafosymen» 0:0 esebimen teń tústi.

Aǵylshyndyq komanda jarys barysynda Ispanııanyń «Atletık Bılbao» (2:0), Grekııanyń «Olımpıakos» (2:0), Ispanııanyń «Atletıko Madrıd» (4:0), Chehııanyń «Slavııa» (3:0), Germanııanyń «Bavarııa» (3:1), Belgııanyń «Brıýgge» (3:0), Italııanyń «Inter» (3:1) klýbtarynan basym tústi. 

Eske salsaq, budan buryn «Arsenaldyń» bas bapkeri «Qaıratty» tájirıbeli qarsylas dep baǵalady.