Chempıondar lıgasy: «Qaırat» úshinshi irikteý kezeńinde qaı komandamen kezdesedi

ALMATY. KAZINFORM — Almatylyq «Qaırat» UEFA Chempıondar lıgasy úshinshi irikteý kezeńinde qaı komandamen oınaıtyny belgili boldy. 

Jarystyń atalǵan satysynda qazaqstandyq klýb Slovakııanyń «Slovan» komandasymen sheberlik baıqasady. Alǵashqy oıyn 5 tamyzda Almaty qalasynda ótkizilse, 12 tamyzda Bratıslava qalasynda bolady.

Aıta ketsek, almatylyq fýtbolshylar birinshi jáne ekinshi irikteý kezeńinde Slovenııanyń «Olımpııa» (1:1, 2:0), Fınlıandııanyń KýPS klýbtaryn (0:2, 3:0) qapy qaldyryp ketti.

Al slovakııalyq klýb ekinshi irikteý kezeńinde Bosnııa jáne Gertsogovınanyń «Zrınskı» komandasyn (4:0, 2:2) jeńdi.

«Slovan» komandasy 1919 jyly qurylǵan. Óz elinde 15 márte chempıondyq tuǵyrǵa kóterildi. Sondaı-aq 5 márte kúmis, 6 márte qola júldeger atandy. Oǵan qosa 10 márte Slovakııa kýbogyn tóbesine kóterdi.

Slovakııalyq klýbtyń bas bapkeri Vladımır Vaıss 2013-2015 jyldarda «Qaırattyń» tizginin ustaǵan edi.

Qazirgi quramynda 2019-2021 jyldarda qazaqstandyq «Qaısar», «Astana» klýbtarynyń namysyn qorǵaǵan armenııalyq fýtbolshy Tıgran Barsegıan oıyn kórsetedi.

Sondaı-aq elimizdiń atynan 31 shildede «Astana» men «Aqtóbe» Konferentsııa lıgasy ekinshi irikteý kezeńindegi qarymta oıyndaryn ótkizedi.