Chempıondar lıgasy: «Qaırat» syrt alańda «Kopengagenge» ese jiberdi

ASTANA. KAZINFORM — Fýtboldan UEFA Chempıondar lıgasy negizgi kezeńiniń besinshi týrynda qazaqstandyq «Qaırat» syrt alańda Danııanyń «Kopengagen» komandasymen kezdesti.

Alǵashqy mınýttan danııalyq komanda tizgindi óz qolynda ustaýǵa tyrysty. Kóbirek shabýyl jasap, gol soǵatyn múmkindikti izdedi. Osyndaı sátterdiń birinde olardyń qatarynan Vıktor Dadason 26-mınýtta kózdegen nysanadan múlt ketken joq.

Ekinshi kezeńde de alań ıeleri shabýylǵa kóbirek kóńil bóldi. Oıynnyń 59-mınýtynda «Qaırat» qaqpasyna belgilengen penaltıden Djordan Larsson múlt ketken joq.

Al 73-mınýtta «Kopengagen» sapynan Robert basymdyqty arttyrdy.

Oıynnyń 81-mınýtynda almatylyq klýbtan Dastan Sátpaev danııalyq qaqpashynyń qateligin paıdalanyp, óziniń atalǵan týrnırdiń negizgi kezeńindegi alǵashqy golyn soqty.

Al 90-mınýtta «Qaırattyń» taǵy bir oıynshysy Oljas Baıbek kózdegen nysanadan múlt ketken joq.

Osylaısha qazaqstandyq komanda qarsylasyna 2:3 esebimen ese jiberdi.

«Qaırat» Portýgalııanyń «Sportıngine» 1:4, Ispanııanyń «Real Madrıdine» 0:5, Italııanyń «Interine» 1:2 esebimen jol berse, Kıprdiń «Pafosymen» 0:0 esebimen teń tústi.

Al «Kopengagen» komandasy Germanııanyń «Baıerimen» 2:2 esebimen teń oınap, odan keıin Ázerbaıjannyń «Karabah» klýbynan 0:2, Germanııanyń «Borýssııa Dortmýndynan» 2:4, Anglııanyń «Totenhem Hotspýrynan» 0:4 esebimen jeńilip qalǵan edi.

Endi qazaqstandyq klýb odan keıin 9 jeltoqsanda Astanada Grekııanyń «Olımpıakos», 2026 jyldyń 20 qańtarynda Belgııanyń «Brıýgge» klýbyn qabyldaıdy.