Chempıondar lıgasy: «Qaırat» óz alańynda «Slovannan» basym tústi

ALMATY. KAZINFORM - Almatylyq «Qaırat» búgin fýtboldan UEFA Chempıondar lıgasy úshinshi irikteý kezeńinde Slovakııanyń «Slovan» komandasymen alǵashqy oıynyn ótkizdi.

Kezdesý barysynda komandalar bir-biriniń qaqpasyna jyldam gol soǵýǵa tyrysty. Alǵashqy mınýttan shabýyl uıymdastyryp, qaqpadan sańylaý tabýǵa tyrysty. Soǵan qaramastan birinshi kezeńde tablodaǵy esepke ózgeris engen joq.

Ekinshi kezeńde qazaqstandyq klýbtyń basymdyǵy baıqalyp turdy. Esesine slovakııalyq komanda oıynshylary dórekiligimen kózge tústi. Osyndaı sátterdiń birinde «Slovan» sapynan Rahım Ibrahım 65-mınýtta qyzyl qaǵazben alańnan qýyldy. Oıynnyń 90-mınýtynda «Qaırat» sapynan Dastan Sátpaev penaltıden múlt ketken joq. 

Al 95-mınýtta Dastan Sátpaevtyń bergen pasyn áriptesi Rıkardıno golǵa aınaldyrǵan edi. Degenmen ony bas tóreshi VAR qaraǵannan keıin fýtbolshy oıynnan tys qaldy degen jeleýmen jaratpaı tastady.

Endi komandalar 12 tamyzda Slovakııa astanasy Bratıslava qalasynda qarymta oıyn ótkizedi.
Almatylyq fýtbolshylar birinshi jáne ekinshi irikteý kezeńinde Slovenııanyń «Olımpııa» (1:1, 2:0), Fınlıandııanyń KýPS klýbtaryn (0:2, 3:0) qapy qaldyryp ketti.

Al slovakııalyq klýb ekinshi irikteý kezeńinde Bosnııa jáne Gertsogovınanyń «Zrınskı» komandasyn (4:0, 2:2) jeńdi.

Eger «Qaırat» komandasynyń fýtboldan UEFA Chempıondar lıgasy úshinshi irikteý kezeńinen irkilmeı ótken jaǵdaıda pleı-off kezeńinde shotlandııalyq «Seltık» komandasymen oınaıdy.

Al Eýropa lıgasynyń pleı-off kezeńine túsken jaǵdaıda shveıtsarııalyq «ıAng Boız» klýbymen sheberlik baıqasýy múmkin.

Endi elordalyq «Astana» Konferentsııa lıgasy úshinshi irikteý kezeńinde syrt alańda Shveıtsarııanyń «Lozanna» komandasymen oınaıdy.