Chempıondar lıgasy: «Qaırat» óz alańynda «Pafospen» teń oınady
ASTANA. KAZINFORM - UEFA Chempıondar lıgasy negizgi kezeńindegi úshinshi týrda «Qaırat» pen «Pafos» (Kıpr) kezdesýi aıaqtaldy.
Komandalar bul týrnırde bıyl alǵash ret qatysyp otyr. Degenmen alǵashqy eki týrda olar qarsylastaryna ese jiberdi. Sondyqtan oıyn barysynda ekeýi jeńiske kúsh salatyny anyq edi.
Alǵashqy mınýttan jyldam gol soǵýǵa tyrysqan almatylyq klýb shabýylǵa kóńil bóldi. Osyndaı sátterdiń birinde kıprlik klýbtan Joaý Korreıa «Qaırat» qorǵaýshysy Lýısh Mataǵa qarsy dóreki qımyl kórsetti. Ony anglııalyq tóreshi Krıs Kavana nebári 4-mınýtta birden alańnan qýdy.
Jasyl alańda on oıynshymen qalǵan «Pafos» endigi kezekte negizinen qorǵanysqa kóńil bóldi. Qazaqstandyq komanda shabýylǵa shyqqanymen laıyqty toıtarys berdi. Nátıjesinde birinshi kezeńde tablodaǵy esepke ózgeris engen joq.
Ekinshi kezeńde de almatylyq klýb gol soǵatyn múmkindikti izdedi. Dese de odan keıin kıprlik fýtbolshylardyń belsendiligi baıqaldy. Bul sátte Temirlan Anarbekov óz qaqapasyn goldan aman alyp qaldy.
Osylaısha komandalar 0:0 esebine qanaǵat bildirdi. Endi almatylyq klýb aldaǵy oıynyn 5 qarashada syrt alańda Italııanyń «Inter» komandasyna qarsy ótkizedi.
Almatylyq fýtbolshylar týrnırdiń alǵashqy úsh irikteý kezeńinde Slovenııanyń «Olımpııa» (1:1, 2:0), Fınlıandııanyń KýPS klýbtaryn (0:2, 3:0), Slovakııanyń «Slovan» (1:0, 0:1, penaltıden 4:3) komandasyn qapy qaldyryp ketti. Al pleı-off kezeńinde Shotlandııanyń «Seltık» komandasyn (0:0, 0:0, penaltıden 3:2) jeńip, negizgi kezeńge joldama alǵan edi.
Eske salsaq, budan buryn Chempıondar lıgasy negizgi kezeńinde Portýgalııanyń «Sportıng» (1:4) jáne Ispanııanyń «Real Madrıd» (0:5) komandalarynan jeńilip qaldy.
