Chempıondar lıgasy: «Qaırat» óz alańynda madrıdtik «Realdan» iri eseppen jeńildi
ALMATY. KAZINFORM — UEFA Chempıondar lıgasy negizgi kezeńiniń ekinshi týrynda qazaqstandyq «Qaırat» (Almaty) ıspanııalyq «Real Madrıd» (Ispanııa) komandasyn qabyldady.
Almatynyń Ortalyq stadıonyndaǵy tarıhı match alań ıeleriniń shabýylymen bastaldy. Áp degennen «Qaırat» oıynshylary qonaqtarǵa qaýip tóndirip, Kýrtýanyń qaqpasyn torýyldaýmen boldy. Alaıda Habı Alonso jattyqtyratyn fýtbolshylar da qarap qalmady. Oraıy kelgende shabýylǵa shyǵyp, Sherhan Qalmyrzanyń da sheberligin tekserip kórdi.
Kezdesýdiń 25-mınýtynda «Qaırat» komandasynyń qaqpasyna penaltı belgilenip, on bir metrlikten onynshy nómirdegi Mbappe gol soqty. Osylaısha koroldik klýb esepte alǵa shyqty. Munan soń tablodaǵy esep ekinshi taımda ózgerdi. «Realdyń» úzdigi Kıllıan 52-mınýtta dýbl avtory atandy. Oıynnyń 58 mınýtynda Mbappeniń tamasha múmkindigi bolǵan. Alaıda qaqpa aldynda bilgeninen jańyldy. Degenmen qyraǵy shabýylshy 74-mınýtta het-trık jasap, esepti eseleı tústi.
Qonaqtar munymen toqtap qalmady. Kezekti shabýyldarynyń birin Kamavınga golǵa aınaldyrdy. Frantsııalyq oıynshy 83-mınýtta kezdesýdegi tórtinshi goldy óz atyna jazdy. Al, Braım Dııas oıynnyń núktesin qoıdy.
Ókinishke qaraı, Ortalyq stadıondaǵy 22 788 jankúıer jınalǵan oıynda alań ıeleri 0:5 esebimen qarsylas komandaǵa jol berdi.
Eske sala keteıik, buǵan deıin «Qaırat» U-19 komandasy Jasóspirimder lıgasynda «Real Madrıd» jastarynan 1:4 esebimen jeńilip qalǵanyn jazǵan edik.