Chempıondar lıgasy: «Qaırat» komandasynyń alǵashqy qarsylasy anyqtaldy

ASTANA. KAZINFORM - Almatylyq «Qaırat» fýtbol komandasynyń UEFA Chempıondar lıgasy birinshi irikteý kezeńinde Slovenııanyń «Olımpııa» komandasymen kezdesedi.

Jarystyń atalǵan satysyndaǵy alǵashqy oıyn 8 nemese 9 shilde kúni Slovenııada ótkizilse, qarymta kezdesý Almatyda 15 nemese 16 shildege belgilengen.

Almatylyq klýb eýrokýbok oıyndaryna turaqty túrde qatysyp keledi. Degenmen sońǵy eki jylda baq synaǵan joq. 2022/23 jylǵy maýsymda Konferentsııa lıgasy ekinshi irikteý kezeńinde Vengrııanyń «Kıshvarda» (0:1, 0:1) komandasynan eki márte jeńilip qaldy.

«Olımpııa» komandasy 1945 jyly qurylǵan. Qazirge deıin óz elinde segiz márte chempıon atandy. Eýrokýbok oıyndaryna alǵash ret 1966 jyly qatysty. Sońǵy ret 2020/2021 jylǵy maýsymda eýropa lıgasy ekinshi irikteý kezeńine deıin jetti.

Sondaı-aq bıyl qazaqstandyq «Aqtóbe» Eýropa lıgasy, «Ordabasy» jáne «Astana» Konferentsııa lıgasynda el namysyn qorǵaıdy.