Chempıondar lıgasy: «Qaırat» fýtzal quramasy fınalda «Palmamen» kezdesedi

ASTANA. KAZINFORM -Almatylyq «Qaırat» fýtzaldan Chempıondar Lıgasynyń fınalynda ıspanııalyq «Palmamen» kezdesedi.

Bul oıyn 4 mamyrda Qazaqstan ýaqyty boıynsha saǵat 23:00-de bastalyp, «Qazsport» telearnasynan tikeleı efırde kórsetiledi.

Almatylyq budan buryn «Qaırat» jartylaı fınalda taǵy bir ıspanııalyq «Kartahena» klýbynan 3:2 esebimen basym tústi. 

Qazaqstandyq komandadan Alısson 16, 37-mınýtta eki gol soqsa, Dennıs 39-mınýtta qaqpany dáll kózdedi. Al «Kartahenada» Mıgel Anhel Melıado (20-mınýt) jáne Gabrıel Motta (40-mınýt, penaltıden) gol soqty. 

«Palma» jartylaı fınalda portýgaldyq «Sportıngti» 3:0 esebimen jeńdi. Ispandyqtar sapynan Isa Gordılo (28-mınýt), Marıo Rıvılos (39-mınýt) jáne Lýan Mıýller (40-mınýt) mergendik tanytty.

«Qaırat» 2012/13, 2014/15 jyldardaǵy maýsymda Chempıondar lıgasynda top jarsa, 2018/19 jyldarda fınalǵa deıin jetti.

Sondaı-aq olar tórt márte qola júldeger boldy.

Almatylyq klýbtyń bas bapkeri Marlon Velasko atalǵan týrnırge tómendegi shákirtterin alyp bardy. Qaqpa Dennıs pen Narýn Serikovke senip tapsyryldy. Al oıynshylar qatarynda Arnold Knaýb, Edson, Jahangır Rashıt, Dener, Zanotto, Dáýren Tursaǵulov, Birjan Orazov, Kaıo Rýız, Otanıa, Kevın Arrıeta, Gege, Vendel da Sılva Mendes, Alısson bar.

Tórttiktiń fınaly Frantsııanyń Le-Man qalasynda 2-4 mamyr aralyǵynda ótip jatyr.