Chempıondar lıgasy: «Qaırat» fýtzal klýby horvatııalyq klýbtan basym tústi

ASTANA. KAZINFORM — Almatylyq «Qaırat» fýtzaldan UEFA Chempıondar lıgasynyń negizgi kezeńindegi alǵashqy oıynynda Horvatııanyń «Novo Vrıeme» komandasynan basym tústi.

Almatylyq klýb tórtinshi topta synǵa túsedi. Qarsylastary — «Sportıng» (Portýgalııa), «Prıshtına» (Kosovo) jáne «Novo Vrıeme» (Horvatııa). 

Kezdesý barysynda almatylyq klýb alǵashqy mınýttan tizgindi óz qolynda ustaýǵa tyrysty. Olardyń qatarynan Birjan Orazov 8, 9-mınýtta eki gol soǵyp úlgerdi. Odan keıin 16-mınýtta qazaqstandyq komanda sapynan Edson Santos mergendik tanytty. 

Ekinshi kezeńde oǵan horvatııalyq klýb eki gol soǵyp, esep aıyrmasyn qysqartty.Osylaısha almatylyq komanda alǵashqy oıynynda qarsylasyn 3:2 esebimen tize búktirdi.
Endi «Qaırat» 30 qazanda Portýgalııanyń «Sportıngimen» oınasa, 1 qarashada kosovolyq «Prıshtınamen» alańǵa shyǵady.

Sondaı-aq atalǵan týrnırde taǵy bir qazaqstandyq «Semeı» komandasy úshinshi topta alǵashqy oıynda «Hrýdım» (Chehııa) klýbyn 9:5 esebimen jeńdi.

Endi olar 30 qazanda «Etýal» (Frantsııa), 1 qarashada «Palma» (Ispanııa) komandalarymen sheberlik baıqasady.

Árbir toptan alǵashqy úsh orynǵa ıe bolǵan komandalar týrnırdiń elıtalyq kezeńine joldama alady.