Chempıondar lıgasy: «Qaırat» fınalǵa joldama aldy

ASTANA. KAZINFORM — Fýtzaldan Chempıondar lıgasy jartylaı fınalynda almatylyq «Qaırat» Ispanııanyń «Kartahena» klýbyn jeńip, fınalǵa joldama aldy.

Oıynnyń birinshi kezeńi tartysty órbidi. Komandalar birden shabýylǵa kóshti. Dese de bir-biriniń qaqpasynan sańylaý taba alǵan joq. Almatylyq klýbtan Alısson 16-mınýtta mergendik tanytsa, 39-mınýtta ıspanııalyq klýb tarazy basyn teńestirdi.

Biirinshi kezeńde komandalar 1:1 esebine qanaǵat bildirdi. 

Ekinshi kezeńde «Kartahena» basymdyqty arttyra tústi. Gol soǵatyn múmkindikti izdedi. Oǵan almatylyq klýb oıynshylary laıyqty qarsylyq kórsetti. 

Oıynnyń 37-mınýtta Alısson taǵy bir goldy óziniń enshisine jazsa, Dennıs 39-mınýtta basymdyqty arttyrdy. 

Al 40-mınýtta «Qaırat» qaqpasyna belgilengen penaltıden ıspanııalyqtar múlt ketken joq.

Osylaısha almatylyq klýb qarsylasynan 3:2 esebimen basym túsip, fınalǵa joldama aldy. 

Sondaı-aq taǵy bir jartylaı fınalda «Palma» (Ispanııa) men «Sportıng» (Portýgalııa) oınaıdy.

Fınal 4 mamyr kúni ótkiziledi.

Eske salsaq, budan buryn olar Horvatııa astanasy Zagreb qalasynda Chempıondar lıgasynyń elıtalyq kezeńinde horvatııalyq «Fýtzal Dınamony» 5:1, «Olmıssýmdy» 1:0. slovakııalyq «Mımel Lýchenetsti» 4:2 esebimen tize búktirdi.

Almatylyq komanda buǵan deıin bul týrnırde 20 márte baq synap úlgerdi. Bul jóninen Eýropa qurlyǵyndaǵy komandalar arasynda absolıýtti rekordty tirkedi.

Olar 2012/13, 2014/15 jylǵy maýsymda Chempıondar lıgasynda jeńis tuǵyryna kóterilgen.