Chempıondar lıgasy: «Qaırat» elordada «Brıýgge» komandasyna ese jiberdi
ASTANA. KAZINFORM - UEFA Chempıondar lıgasy negizgi kezeńi jetinshi týrynda búgin qazaqstandyq «Qaırat» (Almaty) elordada Belgııanyń «Brıýgge» (Brıýssel) komandasymen kezdesti.
Bıylǵy týrnırde komandalar jankúıer senimin aqtaı almaı keledi. Almatylyq klýb qazirge deıin alty kezdesýdiń beseýinde jeńilistiń aşy dámin tatyp, bireýinde teń nátıjege qanaǵat bildirdi.
Al belgııalyq komanda bir márte jeńip, bireýinde teń tússe, qalǵanynda qarsylastaryna ese jiberdi.
Sondyqtan eki komanda úshin búgin jeńiske jetýdiń mańyzy artty. Alǵashqy mınýttan birden shabýylǵa kóshken qarsylastar jyldam gol soǵý múmkindigin izdedi. Degenmen belgııalyq komandanyń esep ashatyn múmkindigi kóbirek baıqaldy.
Oıynnyń 32-mınýtynda «Brıýgge» sapynan Aleksandar Stankovıch mergendik tanytsa, Hans Vanaken 38-mınýtta esepti ústemeleı tústi.
Ekinshi kezeńde qazaqstandyq komanda shabýylǵa kóbirek kóńil bóldi. Kóp sátte dáldik jetispeı jatty. Esesine óz qaqpasyna taǵy eki gol jiberip aldy. Ony belgııalyq klýb sapynan Romeo Verman 74, Romeo Verman 84-mınýtta óziniń enshisine jazdy.
Al «Qaırat» sapynan Ádilet Sadybekov 92-mınýtta bir golmen jaýap qaıyrdy.
Osylaısha almatylyq klýb qarsylasynan 1:4 esebimen jeńilip qaldy.
Qazirge deıin «Qaırat» Portýgalııanyń «Sportıngine» 1:4, Ispanııanyń «Real Madrıdine» 0:5, Italııanyń «Interine» 1:2, Grekııanyń «Olımpıakosyna» 0:1, Danııanyń «Kopengagenine» 2:3 esebimen jol berse, Kıprdiń «Pafosymen» 0:0 esebimen teń tústi.
Endi almatylyq klýb aldaǵy oıynyn 28 qańtarda Anglııanyń «Arsenal» komandasyna qarsy ótkizedi.