Chempıondar lıgasy: «Qaırat» ekinshi irikteý kezeńine shyqty
ASTANA. KAZINFORM - Qazaqstandyq «Qaırat» fýtbol klýby UEFA Chempıondar lıgasy birinshi irikteý kezeńinde syrt alańda Chernogorııanyń «Sýteska» komandasyna qarymta oıyn ótkizdi.
Alǵashqy kezdesýde almatylyq klýb qarsylasynan 2:1 esebimen basym túsken edi. Nátıjesinde olar qarymta kezdesýde qarsylasynan eki dop aıyrmasymen jeńilmeýi tıis edi.
Búgingi kezdesý barysynda komandalar alǵashqy mınýttan tartysty oıyn ótkizdi. Dese de birinshi kezeńde tablodaǵy esepke ózgeris engen joq.
Ekinshi kezeńde qazaqstandyq komanda sapynan 68-mınýtta Ismaıl Bekbolat gol soǵyp, óz komandasyn alǵa shyǵarsa, 82-mınýtta Jorjıno qorytyndy esepti belgiledi.
Osylaısha olar qarsylasynan 2:0 esebimen basym túsip, jarysty jalǵastyrýǵa múmkindik aldy.
Endi almatylyq klýb ekinshi irikteý kezeńinde Kıprdiń «Omonııa» klýbymen sheberlik baıqasady.
Bul komandamen almatylyq komandanyń joly budan buryn 2021/2022 jylǵy maýsymda Konferentsııa lıgasy toptyq kezeńinde túıisken edi. Ol joly eki kezdesýde de 0:0 esebi tirkeldi.
Ekinshi irikteý kezeńi 21-22 jáne 28-29 shilde kúnderine belgilengen.
Aıta ketsek, almatylyq klýb ótken maýsymda Chempıondar lıgasy negizgi kezeńinde Portýgalııanyń «Sportıngine» 1:4, Ispanııanyń «Real Madrıdine» 0:5, Italııanyń «Interine» 1:2, Grekııanyń «Olımpıakosyna» 0:1, Danııanyń «Kopengagenine» 2:3, Belgııanyń «Brıýggesiine» 1:4, Anglııanyń «Arsenalyna» 2:3 esebimen jol berse, Kıprdiń «Pafosymen» 0:0 esebimen teń tústi.
