Chempıondar lıgasy: «Qaırat» búgin Slovakııanyń «Slovan» komandasymen kezdesedi

ALMATY. KAZINFORM — Almatylyq «Qaırat» búgin fýtboldan UEFA Chempıondar lıgasy úshinshi irikteý kezeńinde alǵashqy oıynyn ótkizedi.

Jarystyń atalǵan satysynda qazaqstandyq klýb Slovakııanyń «Slovan» komandasymen sheberlik baıqasady. 

Alǵashqy oıyn búgin, 5 tamyzda Almaty qalasynda qazaqstandyq ýaqytpen 20:00–de bastalyp, «Qazsport» telearnasynan tikeleı efırde kórsetiledi. 

Bul kezdesýde Nıderland eliniń ókili Serdara Gezıýbıýıýk bastaǵan tóreshiler brıgadasy qyzmet atqarady. Oǵan otandastary Ervın Zeınstra men Patrık Inıa kómektesedi. Tórtinshi tóreshi de sol eldiń ókili — ıAnnık van der Laan.

Qarymta oıyn 12 tamyzda Slovakııa astanasy Bratıslava qalasynda bolady.

Almatylyq fýtbolshylar birinshi jáne ekinshi irikteý kezeńinde Slovenııanyń «Olımpııa» (1:1, 2:0), Fınlıandııanyń KýPS klýbtaryn (0:2, 3:0) qapy qaldyryp ketti.
Al slovakııalyq klýb ekinshi irikteý kezeńinde Bosnııa jáne Gertsogovınanyń «Zrınskı» komandasyn (4:0, 2:2) jeńdi.

«Slovan» komandasy 1919 jyly qurylǵan. Óz elinde 15 márte chempıondyq tuǵyrǵa kóterildi. Sondaı-aq 5 márte kúmis, 6 márte qola júldeger atandy. Oǵan qosa 10 márte Slovakııa kýbogyn tóbesine kóterdi.

Slovakııalyq klýbtyń bas bapkeri Vladımır Vaıss 2013-2015 jyldarda «Qaırattyń» tizginin ustaǵan edi.

Qazirgi quramynda 2019-2021 jyldarda qazaqstandyq «Qaısar», «Astana» klýbtarynyń namysyn qorǵaǵan armenııalyq fýtbolshy Tıgran Barsegıan oıyn kórsetedi.

Eger «Qaırat» komandasynyń fýtboldan UEFA Chempıondar lıgasy úshinshi irikteý kezeńinen irkilmeı ótken jaǵdaıda pleı-off kezeńinde shotlandııalyq «Seltık» komandasymen oınaıdy.

Al Eýropa lıgasynyń pleı-off kezeńine túsken jaǵdaıda shveıtsarııalyq «ıAng Boız» klýbymen sheberlik baıqasýy múmkin.