Chempıondar lıgasy: «Qaırat» búgin syrt alańda «Omonııamen» kezdesedi
ASTANA. KAZINFORM - Búgin qazaqstandyq «Qaırat» (Almaty) fýtboldan UEFA Chempıondar lıgasynyń ekinshi irikteý kezeńinde Kıprdiń «Omonııa» (Nıkosııa) klýbymen kezdesedi.
Bul kezdesý búgin, 22 shildede Qazaqstan ýaqytymen 22:00-de bastalyp, «Qazsport» telearnasynan tikeleı efırde kórsetiledi.
Jankúıerler «Omonııany» Kıprdegi eń tanymal jáne júldege kóp qol jetkizgen komanda retinde jaqsy biledi. El astanasy - Nıkosııa atynan synǵa túsetin klýb 1948 jyly qurylǵan. Qazirge deıin 22 márte chempıondyq ataqqa qol jetkizse, 16 márte ulttyq kýbokty tóbesine kóterdi. Sońǵy ret byltyr chempıondyq tuǵyrǵa kóterildi. Oǵan deıin úsh jyl boıy eshqandaı trofeıge qol jetkize alǵan joq.
Eki komanda 2021/2022 jylǵy maýsymda Konferentsııa lıgasy toptyq kezeńinde bir-birimen kezdesken edi. Eki oıynda da esep ashylǵan joq. Eki komanda da toptyq kezeńnen árige asa almady. Sol ýaqytta komandada oıyn kórsetken golkıper Fabıano, qorǵaýshy Nıkolas Panaıotý, shabýylshy Andronıkos Kakýllıs ornyn saqtap qaldy. Kıprlik klýbtyń qazirgi kapıtany Ioannıs Kýsýlos alǵan jaraqaty saldarynan bes jyl buryn eki kezdesýden de tys qalyp qoıdy.
Qazaqstandyq komanda Chempıondar lıgasy úshinshi irikteý kezeńine shyqqan jaǵdaıda «Levskı» (Bolgarııa) - «Ýnıversıtatıa Kraıova» (Rýmynııa) jubynyń jeńimpazymen kezdesedi. Oǵan deıin 22 jáne 29 shilde kúnderi almatylyq klýb ekinshi irikteý kezeńinde Kıprdiń «Omonııa» klýbymen sheberlik baıqasady.
Eger ekinshi irikteý kezeńinde qarsylasyna ese jibergen jaǵdaıda «Qaırat» Eýropa lıgasy úshinshi irikteý kezeńinde «Melbıý» (Shvetsııa) - «Lınkoln Red Imps» (Gıbraltar) jubynyń jeńimpazymen oınaıdy.
Aıta ketsek, almatylyq klýb ótken maýsymda Chempıondar lıgasy negizgi kezeńinde Portýgalııanyń «Sportıngine» 1:4, Ispanııanyń «Real Madrıdine» 0:5, Italııanyń «Interine» 1:2, Grekııanyń «Olımpıakosyna» 0:1, Danııanyń «Kopengagenine» 2:3, Belgııanyń «Brıýggesiine» 1:4, Anglııanyń «Arsenalyna» 2:3 esebimen jol berse, Kıprdiń «Pafosymen» 0:0 esebimen teń tústi.
