Chempıondar lıgasy: «Qaırat» búgin fınalda «Palmamen» kezdesedi

ASTANA. KAZINFORM - Almatylyq «Qaırat» fýtzaldan Chempıondar lıgasy tórttigi fınalynda búgin Ispanııanyń «Palma» komandasymen kezdesý ótkizedi.

Oıyn Qazaqstan ýaqytymen 22:50-de bastalyp, «Qazsport» telearnasynan tikeleı efırde kórsetiledi.

Jartylaı fınalda «Qaırat» ıspanııalyq «Kartahenany» 3:2 esebimen súrindirse, «Palma» portýgalııalyq «Sportıngten» 3:0 esebimen basym tústi.

Qazirge deıin qarsylastar eki márte kezdesti. Chempıondar lıgasy toptyq kezeńinde 2022 jyly alǵashqy oıynda 2:2 esebimen teń tússe, 2023 jyly ıspanııalyq komanda 4:3 esebimen jeńiske jetti. Ol joly óz tobynda «Palma» birinshi oryn alsa, «Qaırat» úshinshi orynǵa turaqtady. Ekeýi de jarystyń kelesi satysyna shyqty.

Almatylyq komanda buǵan deıin bul týrnırde 20 márte baq synap úlgerdi. Bul jóninen Eýropa qurlyǵyndaǵy klýbtar arasynda absolıýtti rekordty tirkedi. Olar 2012/13, 2014/15 jylǵy maýsymda Chempıondar lıgasynda jeńis tuǵyryna kóterilgen.

Al «Palma» atalǵan týrnırde 2022/23, 2023/24 jyldary jeńimpaz boldy.

Bas bapker Marlon Velasko tórttiktiń fınalynda «Qaırat» sapynda tómendegi shákirtterine senim artty. Qaqpa Dennıs pen Narýn Serikovke senip tapsyrylǵan. Al oıynshylar qatarynda Arnold Knaýb, Edson, Jahangır Rashıt, Dener, Zanotto, Dáýren Tursaǵulov, Birjan Orazov, Kaıo Rýız, Otanıa, Kevın Arrıeta, Gege, Vendel da Sılva Mendes, Alısson bar.