Chempıondar lıgasy: «Qaırat» birinshi taımnan keıin KýPS komandasyn jeńip jatyr

ALMATY. KAZINFORM - Almatylyq «Qaırat» fýtbol komandasy UEFA Chempıondar lıgasy ekinshi irikteý kezeńinde Fınlıandııanyń KýPS komandasyn birinshi kezeńnen keıin úsh gol aıyrmasymen jeńip jatyr. 

Alǵashqy oıynda almatylyq klýb atalǵan qarsylasyna 0:2 esebimen jol bergen edi. Sondyqtan alań ıeleri alǵashqy mınýttan tizgindi óz qoldaryna alýǵa tyrysty.

Kezdesý bastala sala qarsylastar qaqpasy mańynda jıi shabýyl uıymdastyrdy. Nátıjesinde 9-mınýtta Dastan Sátpaev esep ashsa, Jorjıno 29, Valerıı Gromyko 44-mınýtta mergendik tanytty. Osylaısha «Qaırat» qarsylasynan birinshi kezeńnen keıin 3:0 esebimen basym tústi. Bul esep almatylyq ujymǵa atalǵan týrnırdiń úshinshi irikteý satysyna joldama alýyna múmkindik beredi. 

Jarystyń atalǵan satysynda qazaqstandyq klýb «Slovan» (Slovakııa) — «Zrınskı» (Bosnııa jáne Gertsogovına) jubynyń jeńimpazymen kezdesedi.

Al birinshi irikteý kezeńinde almatylyq komanda eki oıynnyń nátıjesimen Slovenııanyń «Qlımpııasyn» (1:1, 2:0) esebimen jeńdi.

Sondaı-aq elimizdiń atynan «Astana» men «Aqtóbe» Konferentsııa lıgasy ekinshi irikteý kezeńindegi qarymta oıyndaryn ótkizedi.