Chempıondar lıgasy: «Qaırat» alǵashqy oıynda «Olımpııamen» teń tústi

ASTANA. KAZINFORM - Almatylyq «Qaırat» fýtbol komandasy UEFA Chempıondar lıgasy birinshi irikteý kezeńinde búgin Slovenııanyń «Olımpııa» komandasymen alǵashqy oıynyn ótkizdi.

Kezdesý barysynda slovenııalyq fýtbolshylar kezdesý bastalǵannan tizgindi óz qolynda ustaýǵa tyrysty. Olar almatylyq klýb qaqpasy mańynda jıi boı kórsetti. Dese de oǵan «Qaırat» laıyqty qarsylyq kórsetti. Birinshi kezeńde tablodaǵy esepke ózgeris engen joq. 

Ekinshi kezeńde komandalar alǵa qaraı umtyldy. Osyndaı sátterdiń birinde almatylyq klýb alǵa shyqty. Oıynnyń 59-mınýtta áriptesi Jorjınonyń bergen pasyn Dastan Sátpaev golǵa aınaldyrdy.

Budan keıin «Olımpııa» oıynshylary tarazy basyn teńestirýge umtyldy. Nátıjesinde olardyń qatarynan 66-mınýtta Dıogý Pınto mergendik tanytty.

Kezdesýde komandalar 1:1 esebine qanaǵat bildirdi.

Endi qarymta oıyn 15 shildede Almaty qalasynda ótkiziledi.

Bul jupta jeńimpaz atanǵan komanda ekinshi irikteý kezeńinde «KýPS» (Fınlıandııa) men «Mılsamı» (Moldova) jubynyń jeńimpazymen oınaıdy. 

Sondaı-aq bıyl qazaqstandyq «Aqtóbe» Eýropa lıgasy, «Ordabasy» jáne «Astana» Konferentsııa lıgasynda el namysyn qorǵaıdy.