Chempıondar lıgasy: «Qaırat» alǵashqy kezdesýinde «Omonııaǵa» ese jiberdi
ASTANA. KAZINFORM - Búgin qazaqstandyq «Qaırat» (Almaty) fýtboldan UEFA Chempıondar lıgasynyń ekinshi irikteý kezeńinde Kıprdiń «Omonııa» (Nıkosııa) klýbymen kezdesti.
Oıyn barysynda komandalar alǵashqy mınýttan gol soǵatyn múmkindikti izdedi. Nátıjesinde kıprlik klýb sapynan Panaıotıs Andreý 13-mınýtta esep ashty. Oıynnyń 33-mınýtynda olardyń qatarynan Loık Nego qyzyl qaǵazben alańnan qýyldy.
Qazaqstandyq komandanyń esepti teńestiretin birneshe múmkindigi boldy. Soǵan qaramastan tablodaǵy esep ózgerissiz qaldy.
Osylaısha almatylyq komanda qarsylasyna 0:1 esebimen ese jiberdi.
Endi qarymta kezdesý 29 shildege belgilengen.
Komandalar budan buryn 2021/2022 jylǵy maýsymda Konferentsııa lıgasy toptyq kezeńinde ózara sheberlik baıqasty. Eki kezdesýde de esep ashylǵan joq.
Qazaqstandyq komanda Chempıondar lıgasy úshinshi irikteý kezeńine shyqqan jaǵdaıda «Levskı» (Bolgarııa) - «Ýnıversıtatıa Kraıova» (Rýmynııa) jubynyń jeńimpazymen kezdesedi.
Eger ekinshi irikteý kezeńinde qarsylasyna ese jibergen jaǵdaıda «Qaırat» Eýropa lıgasy úshinshi irikteý kezeńinde «Melbıý» (Shvetsııa) - «Lınkoln Red Imps» (Gıbraltar) jubynyń jeńimpazymen oınaıdy.
Aıta ketsek, almatylyq klýb ótken maýsymda Chempıondar lıgasy negizgi kezeńinde Portýgalııanyń «Sportıngine» 1:4, Ispanııanyń «Real Madrıdine» 0:5, Italııanyń «Interine» 1:2, Grekııanyń «Olımpıakosyna» 0:1, Danııanyń «Kopengagenine» 2:3, Belgııanyń «Brıýggesiine» 1:4, Anglııanyń «Arsenalyna» 2:3 esebimen jol berse, Kıprdiń «Pafosymen» 0:0 esebimen teń tústi.
