Chempıondar lıgasy: «Inter» men «Barselona» teń tústi

ASTANA. KAZINFORM - UEFA Chempıondar lıgasy jartylaı fınalyndaǵy taǵy bir kezdesýde «Barselona» (Ispanııa) men «Inter» (Italııa) kezdesti.

Bul oıyn qos komandanyń alma-kezek shabýylymen jalǵasty. Kezdesý barysynda ıtalııalyq klýb alǵashqy mınýttan tizgindi óz qolynda ustaýǵa tyrysty. Nátıjesinde 1-mınýtta Markýs Tıýram kózdegen nysanadan múlt ketken joq. Al 21-mınýtta onyń áriptesi Denzel Dýmfrıs esepti ulǵaıta tústi.

Óz qaqpasyna qatarynan eki gol jiberip alǵan «Barselona» odan keıin tarazy basyn teńestirýge umtyldy. Osyndaı sátterdiń birinde Lamın ıAmal 24-mınýtta mergendik tanytsa, Ferran Torres 38-mınýtta gol soqty.

Tartysty báseke ekinshi kezeńde osyndaı qarqynda órbı tústi. Denzel Dýmfrıs 64-mınýtta qaıtadan «Interdi» alǵa shyǵardy. Oıynnyń 65-mınýtynda ıtalııalyq komanda qaqpashysy ıAn Zommer óz qaqpasyna gol soǵyp aldy.

Osylaısha komandalar 3:3 esebine qanaǵat bildirip tarasty.

Fınalǵa beriletin joldama 6 mamyrda ótetin qarymta kezdesýde sheshiledi.

Eki komanda buǵan deıin 10 márte kezdesti. Onyń 5-de ıspanııalyq klýb basym tússe, taǵy 3 márte teń oınap, qalǵanynda ıtalııalyq klýb úsh upaı oljalap ketti.

Fınal 31 mamyrda Germanııanyń Mıýnhen qalasyndaǵy «Mıýnhen arena» stadıonynda bolady.

Eske salsaq, budan buryn jartylaı fınaldaǵy alǵashqy kezdesýde anglııalyq «Arsenal» Frantsııanyń «Parı Sen-Jermenine» 0:1 esebimen jol berdi.