Chempıondar lıgasy: «Barselona» men «Arsenal» jarysty jalǵastyrady

ASTANA. KAZINFORM - Fýtboldan UEFA Chempıondar lıgasynyń 1/4 fınalyna taǵy eki joldama «Barselona» men «Arsenal» komandalaryna buıyrdy.

Ispanııanyń «Barselona» komandasy 1/8 fınalda óz alańynda Italııanyń «Napolı» klýbyn qabyldady. 

Kezdesý barysynda ıspanııalyq ujym jyldam gol soǵyp úlgerdi. Olardyń qatarynan Fermın Lopes Martın 15-mınýtta mergendik tanytsa, Rafınıa 17-mınýtta esepti ústemeleı tústi.

Odan keıin «Napolı» sapynan Amır Rrahmanı 17-mınýtta bir golmen jaýap qaıyrdy.

Oıynnyń 83-mınýtynda ıspanııalyq klýbtan Rober Levandovskı qorytyndy esepti belgiledi. 

Osylaısha «Barselona» qarsylasynan 3:1 esebimen basym tústi. 

Eki komanda arasyndaǵy alǵashqy kezdesýde komandalar 1:1 esebine qanaǵat bildirgen edi.

Taǵy bir oıynda Anglııanyń «Arsenal» klýby óz alańynda Portýgalııanyń «Portýyn» 1:0 esebimen qapy qaldyrdy. Dese de eki komanda arasyndaǵy alǵashqy matchta portýgalııalyq ujym dál osyndaı eseppen jeńiske jetti. Qos oıynnyń qorytyndysymen nátıje teńesip, komandalar overtaım ótkizdi. Jeńimpaz penaltı tebý arqyly anyqtaldy. Bul joly «Arsenal» qarsylasyn 4:2 esebimen súrindirdi.

Endi 13 naýryzda «Borýssııa Dortmýnd» (Germanııa) pen PSV (Nıderland), «Atletıko Madrıd» (Ispanııa) pen «Inter» (Italııa) kelesi kezeń joldamasyn sarapqa salady. 

Eske salsaq, budan buryn «Parı Sen-Jermen», «Bavarııa», «Real Madrıd», «Manchester Sıtı» komandalary shırek fınalǵa joldama alǵan edi.