Chempıondar elge oralady
ASTANA. 24 naýryz. QazAqparat - Aldaǵy kúnderi elimizge álem chempıonattarynda júlde alyp, kók baıraǵymyzdy jelbiretken sportshylar Denıs Ten, Alekseı Poltoranın jáne Denıs Kýzın oralady.
25 naýryz kúni jergilikti ýaqyt boıynsha saǵat 5.30-da Almaty áýejaıyna Kanadanyń London qalasynda ótken 2013 jylǵy mánerlep syrǵanaýdan álem chempıonatynyń kúmis júldegeri Denıs Ten ushyp keledi.
Bul otandyq mánerlep syrǵanaýshylardyń Álem chempıonattarynda qol jetkizgen alǵashqy júldesi. Sonymen qatar Denıs Ten 2014 jyly Sochıde ótetin XXII qysqy Olımpıada oıyndaryna eki joldama utyp aldy.
26 naýryzda jergilikti ýaqyt boıynsha saǵat 04.45-te Italııanyń Val Dı Fıemı qalasynda ótken Shańǵy jarysy boıynsha álem chempıonatynyń eki dúrkin qola júldegeri Alekseı Poltoranın men 2013 jylǵy konkımen júgirýden álem chempıony Denıs Kýzın mingen ushaq Astana áýejaıyna qonady.
Shańǵy jarysynan álem cheıpıonatynyń júldesin Qazaqstan 18 jyl kútken bolatyn. Sondaı-aq Alekseı Poltoranın 2012-2013 jylǵy maýsymda álem kýbogi kezeńderinde sátti óner kórsetti.
Konkımen syrǵanaýshy Denıs Kýzınniń altyn medali - Qazaqstan úshin tarıhı oqıǵa. Buǵan deıin elimizdiń sportshylary álem birinshilikterinde júlde alyp kórmegen edi. Osydan buryn tek Lıýdmıla Prokasheva 1998 jyly Naganodaǵy qysqy Olımpıadada qola júldege ıe bolǵan bolatyn.
2012-2013 jylǵy qysqy sporttyq maýsym óte oljaly boldy. Bizdiń shańǵyshylar, konkıshiler men mánerlep syrǵanaýshylar úlken belesterdi baǵyndyrdy. Short-trek, frıstaıl jáne t.b. sport túrleriniń ókilderi joǵary nátıjelerge qol jetkizip júr. Búgingi tańda qysqy sport túrlerinen Qazaqstan Sochıdegi Olımpıadaǵa 30-ǵa jýyq lıtsenzııa utyp aldy jáne bul sandy áli de kóbeıtýge bolady.
