Chempıon atanǵan ShQO-lyq oqýshyny jerlesteri qoshemetpen qarsy aldy
ASTANA. QazAqparat - Rýmynııanyń Býharest qalasynda jalaýy jelbiregen XVI Eýropa chempıonatynda shyǵysqazaqstandyq sportshy Dıas Kostýbaev Kıokýshın kaı-kan karate boıynsha jeńimpaz atandy, dep habarlaıdy «QazAqparat» HAA tilshisi oblystyq sport basqarmasynyń baspasóz qyzmetine silteme jasap.
Saıysqa Eýropanyń 22 elinen aldyńǵy qatarly sportshylar qatysty. Dıas Kostýbaev 12-13 jasqa deıingi jasóspirimder arasynda, 40 kelige deıingi salmaqta Eýropa chempıony atandy. Qazaqstan quramasy atynan bul chempıonatqa 15 sportshy barǵan bolatyn.
Shyǵys óńirinen bir ózi attanǵan jas sportshy barlyǵy 3 jekpe-jek ótkizip, barlyq kezdesýin senimdi utqan. Dıas úshin jarys qojaıynymen ótkizgen alǵashqy kezdesýi qıynǵa soqty. Jartylaı fınaldyq jáne fınaldyq jekpe-jeginde reseılik sportshylardan aılasyn asyryp, Dıas tuǵyrdyń eń bıigin baǵyndyrǵan.
«Bul saıysqa úlken jaýapkershilikpen qarap, 3 aı kóleminde daıyndaldyq. Daıyndyq barysynda Dıastyń salmaqty ustap turýy sál qıynǵa soqty. Rýmynııaǵa jetkenge deıin bul jaǵy rettelip, salmaǵy birqalypty boldy. Qaıtkenmen de jarys biz úshin sátti aıaqtalyp, úzdik nátıjege qol jetkizdik», - dedi Shyǵys Qazaqstan oblystyq kıokýshınkaı-kan karate fılıalynyń jetekshisi Rýslan Alshymbaev.
Rýslan Alshımbaevtyń aıtýynsha, biraz kún tynyqqan soń Dıas aldaǵy kútip turǵan halyqaralyq jarysqa daıyndalatyn bolady.
Aıta ketsek, Dıas osydan birneshe aı buryn Qazaqstan Respýblıkasynyń chempıonatynda top jarǵan bolatyn.
