Chelıabınsk forýmy: SQO - Omby yntymaqtastyǵy jańa deńgeıge kóterildi

ASTANA. QazAqparat - Soltústik Qazaqstan oblysynyń ákimi Qumar Aqsaqalov pen Omby oblysynyń gýbernatory Aleksandr Býrkov Chelıabınskide ótip jatqan Qazaqstan men Reseıdiń HІV óńiraralyq yntymaqtastyǵy forýmy aıasynda yqpaldastyq boıynsha qosymsha kelisimge qol qoıdy, dep habarlaıdy QazAqparat Petropavlovsk.news saıtyna silteme jasap.  

Soltústik Qazaqstan oblysy reseılik óńirlermen, sonyń ishinde Omby oblysymen yntymaqtastyqty belsendi damytýda.

«2017 jyldyń segiz aıynda Reseı Federatsııasymen jasalǵan oblystyń syrtqy saýda aınalymynyń kólemi ótken jyldyń osy kezeńimen salystyrǵanda 31%-ǵa ósti. Birlesken kásiporyndardyń sany jyl saıyn artyp keledi. Bes jylda olardyń sany 40%-ǵa kóbeıdi. Búginde olar bıýdjetke 20 mlrd teńgeden astam salyq tóledi», - dedi SQO ákimi Qumar Aqsaqalov.

Omby oblysynyń gýbernatory tilshilerge málim etkendeı, búginde Qazaqstannyń soltústik óńirlerimen saýda aınalymynyń kólemi aıtarlyqtaı aýqymdy - 240 mln AQSh dollar. Olardyń basym bóligin mashına qurastyrý jáne agroónerkásip keshenderiniń ónimderi quraıdy. Onymen bir mezgilde, Býrkovtyń aıtýynsha, ózara ınvestıtsııalardyń úlesi óte tómen bolyp qalýda.

«Búgin biz Soltústik Qazaqstan oblysymen qosymsha kelisimge qol qoıyp, ár baǵyt boıynsha baǵdarlama qabyldadyq. Onyń ishinde agroónerkásiptik bıznes, bilim berý, mádenıet, ónerkásip salalary bar. 2017-2020 jyldarǵa eseptelgen qujatty ekinshi tarappen muqııat ázirledik», - dep jetkizdi Aleksandr Býrkov.

Aıta keteıik, búgin Elbasy Nursultan Nazarbaev Qazaqstan men Reseıdiń HІV óńiraralyq yntymaqtastyǵy forýmyna qatysý úshin Chelıabınsk qalasyna keldi .

Sapar aıasynda Memleket basshysy Reseı Prezıdenti Vladımır Pýtınmen kezdesti.