Chelıabide eldi dúrliktirgen meteorıt Shubarkól kóline qulady (FOTO)
ASTANA. 16 aqpan. QazAqparat - Reseıdiń Chelıabi oblysyna qulaǵan meteorıtti mamandar jer sharynyń qasynan ótken alyp kometamen baılanystyryp otyr.
Aspan denesi ushyp ótken soń tóbeden otty tas jaýdy, dep habarlaıdy kaz.gazeta.kz saıty.
Japa shekkender sany myńnan asty. Jarylys tolqynynan Chelıabiniń 20 aýdany zardap shekti. Máselen, Chelıabidegi myrysh zaýytynyń tóbesine meteorıttiń bóligi túsip, ol opyrylyp qulaǵan. Ǵımarat ishinde sol boıda órt shyǵyp, tórt jumysshy jaralandy. Óńirdegi mektepterde sabaq toqtatylyp, oqýshylar úılerine taratyldy.
Aspan denesiniń qulaýy astronomdardy tań qaldyrdy. Sebebi kúndelikti zertteý júrgizip júrgen olar tosyn qubylystyń búgin bolaryn múldem kútpegen. Meteorıt Chelıabi oblysyndaǵy Shubarkól kóline qulaǵan. Meteorıt túsken jerdegi oıyqtyń dıametri 6 metrdi qurady.
Al kórshi reseılikterden buryn bul meteorıtti elimizdiń birqatar oblystarynyń turǵyndary baıqapty. Tańsáride Qostanaı oblysynyń Meńdiqara aýdany ústinen ótip, soltústikke qaraı Túmen, Qorǵan, Sverdlovsk arqyly Chelıabige jetken. Áýeden qulap kele jatqan ot jalyndy Aqtóbe, Mańǵystaý men Batys Qazaqstan oblysy turǵyndary da ańǵarǵan. Tipti aqtóbelikter «ushaq qulady» eken dep tótenshe jaǵdaılar qyzmetin tikesinen tik turǵyzdy. Qutqarýshylar turǵyndar aıtqan Mártók jáne Qarǵaly aýdandaryn barlap shyǵyp, eshteńe tappady.
Sondaı-aq Astana mańyna meteorıt synyqtary qulady degen habarlamalar rastalmady, dep habarlady "Interfaks-Qazaqstanǵa" quqyq qorǵaý organdaryndaǵy derekkóz.
"Astana mańy men Aqtóbe oblysynyń birqatar aýdandaryna meteorıt qulady degen aqparat túsken edi. Sol oryndarǵa shyqqan TJM qyzmetkerleri aspan deneleriniń qulaǵandyǵyn kórsetetin eshteńe tappady", - dedi agenttikpen áńgimelesýshi.
