«Chelsıdiń» burynǵy oıynshysy Krıstıan Atsý Túrkııada úıindi astynan óli tabyldy

ASTANA. QazAqparat – Túrkııa «Hataıspor» klýbynyń shabýylshysy, buryn aǵylshyndyq «Chelsı» sapynda oınaǵan Krıstıan Atsý Túrkııada úıindiler astynan óli tabyldy. Bul týraly fýtbolshynyń agenti Mýrat Ýzýnmehmet Twitter paraqshasynda jazdy, dep habarlaıdy QazAqparat.

«Krıstıan Atsý tabyldy. Ókinishke qaraı, ol endi bul ómirde joq», - dep jazdy Ýzýnmehmet.

Túrik «Hataısporynyń» shabýylshysy qıraǵan ǵımarattardyń biriniń astynan tabyldy. Ol 31 jasynda qaıtys boldy.

Atsý ótken aptada Túrkııada joıqyn jer silkinisi bastalǵannan beri izdestirilip jatqan bolatyn. Buǵan deıin «Hataıspor» ókilderi fýtbolshynyń qaıǵyly oqıǵa qarsańynda túrik klýbynan ketetinin málimdegen edi.

Gana quramasynyń oıynshysy osy ýaqytqa deıin aǵylshyndyq «Chelsı», «Everton», «Nıýkasl» jáne «Bornmýt», portýgalııalyq «Portý», ıspandyq «Malaga» jáne basqa da klýbtarda oınaǵan. Atsý túrik «Hataısporyna» 2022 jyldyń qyrkúıeginde qosyldy.

6 aqpanda Túrkııanyń Kahramanmarash provıntsııasynda magnıtýdasy 7 baldan asatyn eki jer silkinisi boldy.

Sońǵy málimetter boıynsha, Túrkııadaǵy jer silkinisi qurbandarynyń sany 39,6 myńnan asty.