«Chelsıdegi» báseke: Dastan Sátbaevtyń negizgi qarsylastarynyń esimi ataldy
ASTANA. KAZINFORM — Ulybrıtanııanyń Daily Mail basylymy 2026/27 jylǵy maýsym qarsańynda londondyq «Chelsıdegi» joǵary básekelestikke nazar aýdardy, dep habarlaıdy Sports.kz.
Basylym málimetinshe, komandanyń bas bapkeri Habı Alonsonyń qaramaǵynda negizgi quramnyń 46 fýtbolshysy bar. Jańa transferlerge baılanysty bul kórsetkish áli de artýy múmkin.
Brıtandyq jýrnalıster Qazaqstan quramasynyń 17 jastaǵy shabýylshysy Dastan Sátbaevqa da toqtalyp, onyń «Chelsıdiń» shabýyl shebinde negizgi quramnan oryn alý úshin qatań básekege tap bolatynyn jazdy.
— Bir jyldyq jaldaý merziminen keıin Nıkolas Djekson shabýylshylar qataryna qaıta qosyldy. Sonymen qatar 2025 jyldyń aqpanynda kelisimshartqa qol qoıǵan, biraq komandaǵa tek bıylǵy tamyzda qosylatyn Qazaqstannyń jas juldyzy Dastan Sátbaev ta keledi, — dep jazady Daily Mail.
Basylym Sátbaevtyń Habı Alonsonyń jetekshiligimen maýsym aldyndaǵy daıyndyq matchtaryna qatysqanyna qaramastan, ázirge klýbtyń resmı saıtyndaǵy negizgi quram tizimine enbegenin de atap ótti.
— Sátbaev Alonsonyń qol astynda alańǵa shyqqanyna qaramastan, klýbtyń resmı saıtyndaǵy negizgi quram tiziminde joq, — delingen maqalada.
Basylymnyń jazýynsha, qazaqstandyq fýtbolshynyń shabýyldaǵy basty básekelesteri — Joao Pedro, Lıam Delap, Mark Gıý, Dennı Ýelbek, Emanýel Emega jáne jaldaý merziminen oralǵan Nıkolas Djekson.
Daily Mail pikirinshe, «Chelsı» basshylyǵy quramdaǵy fýtbolshylar sanyn qysqartý úshin birqatar oıynshylardy satýy nemese jalǵa jiberýi kerek. Keıbir pozıtsııalarda bir orynǵa segizge deıin fýtbolshy talasyp otyr.
Sonymen qatar Mıhaıl Mýdrıktiń dopıng isi aıaqtalǵannan keıin komandaǵa oralýy da Habı Alonso úshin qosymsha qıyndyq týǵyzǵan. Ýkraınalyq vınger qaıtadan «Chelsımen» jattyǵyp, shabýyldaǵy oıyn ýaqytyna úmitkerler qataryna qosyldy.
Qazirdiń ózinde birneshe fýtbolshy klýbtan ketýi múmkin. «Chelsı» Trevo Chalobany «Komoǵa» aýystyrý máselesin talqylap jatyr, al Aksel Dısasıge «Krıstal Pelas» pen «Vest Hem» qyzyǵýshylyq tanytyp otyr.
Osylaısha, Dastan Sátbaev «Chelsıdegi» kásibı mansabyn óte joǵary básekelestik jaǵdaıynda bastamaq. Endi Habı Alonso qazaqstandyq shabýylshyny negizgi quramda qaldyrý, jastar komandasynda oınatý nemese ýaqytsha jalǵa jiberý máselesin sheshýi tıis.
