Chelahtyń qorǵaýshysy Psıhıatrııa ortalyǵyn sotqa berdi
ASTANA. 20 shilde. QazAqparat - «Arqankergen» beketinde shekarashylardy óltirdi degen aıyp taǵylyp otyrǵan
jáne qazirgi ýaqytta Almatydaǵy Psıhıatrııa, psıhoterapııa jáne narkologııa respýblıkalyq ǵylymı-praktıkalyq ortalyǵynda tekserýden ótip jatqan áskerı qyzmetker Vladıslav Chelahtyń qorǵaýshysy ortalyqtyń bas dárigeri Natalıa Logachevany sotqa berdi. Bul týraly Tengrinews.kz tilshisine bergen suhbatynda Chelahtyń advokaty Tólegen Berliqojanov málim etti.
Aryz 19 shilde kúni Almaty aýdanynyń sotyna berildi. Qorǵaýshynyń sózine qaraǵanda, ortalyq Chelahtyń konstıtýtsııalyq quqyqtaryn buzyp otyr jáne advokattyq qyzmetke kedergi keltirýde. «Qorǵaýshy retinde biz oǵan zańdy kómekterdi kórsete alamyz, olar oǵan kedergi keltirýde. Bizdi qorǵalýshyǵa kirgizbeýde. Saraptama, árıne qupııaly túrde ótedi, biraq onyń (avtor - Chelahtyń) bos ýaqyty bar. Olar tańerteńnen keshke deıin saraptama jasamaıdy ǵoı. Ony serýendeýge jáne tamaq qabyldaýǵa shyǵaryp otyrady», - dep atap ótti Berliqojanov.
Onyń sózine qaraǵanda, sálem-saýqat berý jáne zańgerlerdiń keńesteri zańmen ruqsat etilgen. Biraq buǵan jol berilmeýde. Ol sondaı-aq, Chelahpen qaıta kórisý úmitimen Almatyǵa kelgen týysqandaryn, jolyǵýǵa ruqsattyń berilgenin kútýden basqa amal qalmaı otyr. Advokattyń aıtýynsha, psıhıatrııalyq saraptamanyń nátıjelerin jarııalaý 10 kúnge shegeriletini ne onyń erterek jasalatyny ázirge belgisiz.
Eske salaıyq, 19 shilde kúni Psıhıatrııa, psıhoterapııa jáne narkologııa respýblıkalyq ǵylymı-praktıkalyq ortalyǵynyń dırektory Saǵat Altynbekov Chelahtyń psıhıatrııalyq saraptamasynyń qorytyndysyn jarııalaý 10 kúnge shegeriletindigin málim etti. Onyń sebebi sarapshylar qosymsha qujattardy talap etken, al olar tek 17 shilde kúni ǵana keldi.
