Chelah isi boıynsha sot otyrysyna tóraǵalyq etken sýdıa qyzmetinen bosatyldy

ASTANA. KAZINFORM – Joǵarǵy sot keńesiniń kezekti otyrysynyń qorytyndysy boıynsha Jambyl oblystyq soty tóraǵasynyń mindetin atqarýshy Erbol Ahmetjanov qyzmetinen bosatyldy.

– Otyrysta Jambyl oblystyq soty tóraǵasynyń mindetin atqarýshyny laýazymynan bosatý máselesi, sondaı-aq Qazaqstan Respýblıkasy Joǵarǵy soty tóraǵasynyń oblystyq jáne olarǵa teńestirilgen sottardyń tóraǵalaryn taǵaıyndaý týraly usynystary qaraldy. Nátıjesinde Jambyl oblystyq soty tóraǵasynyń mindetin atqarýshysy qyzmetinen bosatyldy, - dedi QR Joǵary sot keńesiniń múshesi Erlan Aıtjanov.

Erbol Ahmetjanov Jambyl oblystyq sotyn 2020 jyldyń aqpan aıynan beri, ıaǵnı shamamen alty jyl basqardy. Ol shekarashy Vladıslav Chelahqa qatysty atyshýly is boıynsha sot otyrysyna tóraǵalyq etken. 2012 jyly jeltoqsanda Taldyqorǵandaǵy mamandandyrylǵan aýdanaralyq áskerı qylmystyq soty Vladıslav Chelahty «Arqankergen» shekara beketinde 15 adamdy óltirgeni úshin kináli dep tanyp, ómir boıyna bas bostandyǵynan aıyrǵan edi.

Sondaı-aq otyrysta Astana soty, Almaty soty jáne Jambyl oblystyq soty tóraǵalaryn taǵaıyndaý máselesi de qaraldy. Bos laýazymdarǵa kandıdattar balamaly negizde usynyldy. Talqylaý nátıjesinde Joǵary sot keńesi Joǵarǵy sot tóraǵasynyń usynystaryn qoldap, taǵaıyndaý úshin kásibı tájirıbesi mol, basqarýshylyq qabileti joǵary sýdıalardy usyndy.

Eske salaıyq, buǵan deıin Tarazda Shavkat Rahmonovtyń áıeline qatysty sot qaraýy bastalǵanyn habarlaǵan edik.