«Chekti talap et - syılyqty utyp al!» aktsııasy: soltústikqazaqstandyq jańa kólik jeńip aldy

ASTANA. QazAqparat - Aǵymdaǵy jylǵy 23 jeltoqsanda QR QM Memlekettik kirister komıtetinde «Chekti talap et - syılyqty utyp al!» aktsııasy boıynsha bas fınal ótti. Onda bas syılyq - Chevrolet markasynyń avtomobıli utysqa tústi, dep habarlaıdy atalǵan vedomstvonyń baspasóz qyzmeti.

Esterińizge salsaq, aǵymdaǵy jylǵy 1 qazan men 15 jeltoqsan aralyǵynda MKK men «Atameken» UKP birlesip, respýblıka boıynsha «Chekti talap et - syılyqty utyp al!» aktsııasyn ótkizgen bolatyn.

27 myńdaı qazaqstandyq aktsııaǵa qatysyp, «Wipon» mobıldi qosymshasy arqyly memlekettik kirister organdaryna 1,5 mln. asa fıskaldy chek jibergen.

Azamattar ózderiniń belsendi áreketi arqyly salyqtyq zańnamanyń oryndalýyna qoǵamdyq baqylaý jasaý múmkindigine ıe boldy.

MKK Tóraǵasy Ardaq Teńgebaev sońǵy jyldary Komıtet kóleńkeli ekonomıkamen kúreske azamattardy keńinen tartyp jatqandyǵy, ıaǵnı qoǵamdyq baqylaýǵa jaǵdaı jasalyp jatqandyǵy týraly aıtty.

Aktsııa ótken eki jarym aı ishinde respýblıka boıynsha 120-dan asa qundy júlde utysqa salyndy, onyń ishinde turmystyq jáne orgtehnıka, baılanys quraldary men ydys-aıaq bar. Chekterdiń eń kóp sanyn Ońtústik Qazaqstan, Shyǵys Qazaqstan oblystary men Almaty qalasynyń turǵyndary jibergen.

MKK Tóraǵasy «Atameken» UKP aktsııany ótkizýge qoldaý jasaǵany úshin, azamattarǵa - aktsııaǵa belsendi qatysqandary úshin, sondaı-aq salyq tóleýshilerge adal óz salyqtyq mindetterin atqaryp júrgendigi úshin alǵysyn bildirdi.

«Atameken» UKP Basqarma tóraǵasynyń orynbasary Murat Ábenov óz kezeginde túbirtekti talap etý ádeti adamdarymyzdyń azamattyq saýattylyǵyn kórsetetindigin atap ótti.

Ol barlyq qazaqstandyqtardy túbirtek talap etýge, al bıznesti salyq tóleýge shaqyrdy. «Sonda bizdiń júldemiz - elimizdiń damyǵan ekonomıkasy bolady», - dedi M.Ábenov.

«Atameken» UKP usynǵan avtomobıldiń utysyna 1 qazan men 15 jeltoqsan aralyǵynda kelip túsken barlyq chekter qatysty.

Jeńimpazdy anyqtaý úshin kez-kelgen chekti tańdaıtyn arnaıy kompıýterlik baǵdarlama qoldanyldy.

Utys barynsha ashyq jáne obektıvti ótkizildi. Ony jurtshylyq, bıznes qaýymdastyǵy men buqaralyq aqparat quraldarynyń ókilderinen turatyn arnaıy komıssııa baqylady.

Avtomobıldiń ıesi Petropavl qalasynyń turǵyny «Qazaqtelekom» AQ jetekshi logıstıgi Ravıl Haırýllın atandy.

Uıymdastyrýshylar jaqsy habardy aıtý úshin jeńimpazǵa birden qońyraý shaldy.

Bas syılyqpen qatar 100 myń jáne 300 myń teńgeniń aqshalaı sertıfıkattary da utysqa salyndy.

Olardy ıesi Almaty qalasynyń turǵyny Qýanysh pen Ońtústik Qazaqstan oblysynyń turǵyny Sáken ıelendi.

Atalmysh aktsııa ekinshi jyl ótkizilip otyr. Ótken jyly avtmobıldi Shyǵys Qazaqstan oblysynyń Tótenshe jaǵdaılar departamentiniń qyzmetkeri utqan bolatyn.

Kelesi jyly da aktsııa jalǵasyn tabatyn bolady.