Chek bolmasa, dúken ıesi satyp alýshynyń taýardy qaıtarý talabynan bas tarta ala ma
ÓSKEMEN. KAZINFORM – El arasynda «Taýarda chek bolmasa, dúken ıesi satyp alýshynyń taýardy qaıtarý týraly talabynan bas tarta ala ma?» degen suraq jıi týyndaıdy. Bul maqalada kópti tolǵandyrǵan osy jáne basqa da saýaldardyń jaýabyn usynbaqpyz.
Taýardy qaıtarý, aıyrbastaý nemese baǵaǵa qatysty daýlar – tutynýshylar jıi kezdesetin máseleler. Kóp jaǵdaıda azamattar chek joǵalǵanda óz quqyqtaryn paıdalana almaımyz nemese jeńildikpen alynǵan taýardy qaıtarýǵa bolmaıdy dep oılaıdy. Alaıda Qazaqstan Respýblıkasynyń zańnamasynda tutynýshylardyń quqyqtary qorǵalǵan.
Kazinform tilshisi Shyǵys Qazaqstan oblysy boıynsha Saýda jáne tutynýshylardyń quqyqtaryn qorǵaý departamenti basshysynyń orynbasary Andreı Troeglazovtan tutynýshylardy tolǵandyratyn eń ózekti suraqtardyń jaýabyn aldy.
- Taýarlyq nemese fıskaldyq chektiń bolmaýy ózdiginen taýardy qaıtarýdan bas tartýǵa negiz bola almaıdy. QR «Tutynýshylardyń quqyqtaryn qorǵaý týraly» Zańynyń 18-baby 2-tarmaǵy men 30-baby 1-tarmaǵyna sáıkes, satyp alýshy taýardy dál osy dúkennen alǵanyn ózge dálelder arqyly rastaı alady. Mundaı dálelderge kýágerlerdiń aıǵaqtary, foto nemese beınejazbalar, bank kartasymen jasalǵan tólem týraly úzindiler jáne satyp alý faktisin dáleldeıtin basqa da qujattar jatady, - dep túsindirdi ol.
Sondaı-aq eger satyp alynǵan taýardyń ólshemi, túsi nemese basqa da sıpattamalary sáıkes kelmese, satyp alýshy ony aıyrbastaýdy talap etýge quqyly. Bul úshin taýar paıdalanylmaǵan bolýy, tutynýshylyq qasıetteri saqtalýy, plombalary men japsyrmalary búlinbeýi jáne satyp alý faktisi rastalýy qajet. Osyndaı jaǵdaıda satýshy taýardy aıyrbastaýǵa mindetti. Eger qajetti taýar satylymda bolmasa, tutynýshyǵa tólengen qarajat tolyq kólemde qaıtarylýy tıis.
- Saýda oryndarynda jıi kezdesetin taǵy bir másele – sóredegi baǵa men kassadaǵy baǵanyń sáıkes kelmeýi. Zańnyń 24-baby 1-tarmaǵyna sáıkes, satýshy tutynýshyǵa taýar týraly, onyń ishinde baǵasy jóninde durys ári ýaqytyly aqparat berýge mindetti. Sondyqtan tutynýshy taýardy sórede kórsetilgen baǵa boıynsha satýdy talap etýge tolyq quqyly, - deıdi Andreı Troeglazov.
Óz sózinde ol jeńildikpen nemese aktsııa kezinde satyp alynǵan taýarlarǵa qatysty da keń taraǵan jańsaq pikirdi joqqa shyǵardy. Mundaı taýarlar da zań talaptaryna saı bolsa, ıaǵnı paıdalanylmaǵan jáne taýarlyq kúıi saqtalǵan jaǵdaıda aıyrbastalady nemese qaıtarylady.
- Sondyqtan «aktsııamen alynǵan taýar qaıtarylmaıdy» degen jazý nemese aýyzsha túsindirý zań talaptarynan joǵary turmaıdy. Tutynýshylarǵa satyp alý kezinde tólemdi rastaıtyn qujattardy saqtaýǵa keńes beremiz. Degenmen chek joǵalǵan kúnniń ózinde, zańda kózdelgen ózge dálelder arqyly óz quqyqtaryn qorǵaýǵa múmkindik bar. Eń bastysy, tutynýshy óz quqyqtaryn bilip, qajet bolǵan jaǵdaıda zań aıasynda talap qoıa alýy tıis, - deıdi departament basshysynyń orynbasary.
Eske salsaq, osyǵan deıin Qyzylordada taýar baǵasyn durys rásimdemegen 42 saýda ornyna aıyppul salynǵany habarlanǵan.
