Chehııalyq mas kúıde Býdapesht-Astana ushaǵynda tártip buzǵan
ASTANA. QazAqparat - Kólik polıtseıleri Chehııa azamatyn tártip buzǵany QR Ákimshilik quqyq buzýshylyq kodeksiniń 3 baby boıynsha jaýapkershilikke tartty, dep habarlaıdy QazAqparat Kóliktegi ІІD baspasóz qyzmetine silteme jasap.
Astana qalasy áýejaıyndaǵy Іshki ister jelilik bóliminiń kezekshi bólimine áýejaıdyń qaýipsizdik qyzmeti dıspetcherinen «Býdapesht-Astana» baǵytyndaǵy ushaq bortynda quqyq buzýshy azamattyń bar ekendigi jóninde habarlama kelip túsken.
«Kólik polıtseıleri tekserý barysynda Cheh Respýblıkasynyń 51 jastaǵy azamatyn anyqtady. Er adam alkogoldi mas kúıde ózin dóreki ustaǵan, bortserikterdiń eskertýine qulaq aspaı, jolaýshylardyń tynyshtyǵyn buzǵan, osylaısha, ákimshilik quqyq buzýshylyq jasaǵan. Medıtsınalyq kýálandyrýdyń qorytyndysyna sáıkes quqyq buzýshynyń jeńil dárejedegi mas kúıde bolǵany anyqtaldy», - delingen habarlamada.
Chehııalyqtyń ústinen qoǵamdyq oryndarǵa masań kúıde kelý, áýe kemelerinde minez-qulyq erejelerin buzý boıynsha ákimshilik hattama toltyryldy jáne 5 AEK (12 025 teńge), 3 AEK (7 215 teńge) kóleminde aıyppul salyndy. Sondaı-aq, onyń ústinen usaq quqyq buzýshylyq jóninde ákimshilik hattama toltyrylyp, Astana qalasynyń mamandyrylǵan aýdanaralyq ákimshilik sotyna jiberildi.
