Chehııadaǵy prezıdent saılaýy: Petr Pavel jeńiske jetti
ASTANA. QazAqparat – Chehııadaǵy prezıdent saılaýynda Petr Pavel jeńiske jetti. NATO-nyń otstavkadaǵy generaly 58,32% daýys jınady, dep habarlaıdy QazAqparat euronews-ke silteme jasap.
Barlyǵy 15 myń ýchaskedegi daýystardy sanaý aıaqtaldy, saılaýǵa qatysýshylardyń sany 70%-dan asqan.
«Bul saılaýda aqıqat, abyroı jáne syılastyq jeńiske jetti», - dedi Petr Pavel óziniń jaqtastary aldynda sóılegen sózinde.
Al, mıllıarder ári burynǵy premer-mınıstr Andreı Babısh jeńilgenin moıyndady. Ony saılaýshylardyń 41,67%-y qoldaǵan.
Sonymen, 61 jastaǵy saıasatker Petr Pavel 9 naýryzda Pragada ant qabyldaıdy. Ol Mılosh Zemannyń ornyna keledi.
Buǵan deıin Chehııada Prezıdent saılaýy ótip jatqany habarlanǵan bolatyn.
