Chehııada jańa koalıtsııalyq úkimet qurý jónindegi kelissózder bastaldy
ASTANA. KAZINFORM — Chehııadaǵy parlament saılaýynyń qorytyndysy belgili boldy — onda «Azamattardyń narazylyq aktsııasy» (ANO) partııasy jeńiske jetti, dep habarlaıdy Kazinform.
Barlyq saılaý okrýgindegi bıýlletender eseptelgennen keıin Andreı Babısh basqaratyn ANO qozǵalysy 34,51% daýys jınady.
Bılik basyndaǵy ODS, KDU-ČSL jáne TOP 09 partııalarynan turatyn «SPOLU» koalıtsııasy 23,36% daýyspen ekinshi orynǵa ıe boldy.
«Starostove» partııasy 11,23% daýys jınap, úshinshi orynǵa shyqty.
«Pırattar» men «Jasyldar» — 8,97%, al «SDPG», «Trıkolora», «Svobodne» jáne PRO partııalary — 7,78% daýysqa ıe boldy. «Avtomobılısty» partııasy 6,77% jınaǵan.
Chehııa parlamentiniń tómengi palatasy — depýtattar palatasy 200 orynnan turady, olardyń árqaısysy 4 jylǵa saılanady. Osylaısha, Andreı Babıshtiń ANO partııasy 80 mandat ıelendi. Sarapshylardyń pikirinshe, ol kópshilik koalıtsııany ońshyl «SDPG» jáne «Avtomobılısty» partııalarymen birigip qurýy múmkin.
Búgin Chehııa prezıdenti Petr Pavel saılaýdan keıingi alǵashqy konsýltatsııany bastady. Ol depýtattar palatasyna ótken partııalar men qozǵalys jetekshilerimen kezdesip jatyr.
Alǵashqylardyń biri bolyp Andreı Babısh keldi, ony saılaýda tabysqa jetken ózge partııalardyń kóshbasshylary iledi. Chehııalyq ČT telearnasynyń habarlaýynsha, Petr Pavel men Babıshtiń kezdesýi tańǵy saǵat 9 shamasynda bastalyp, jarty saǵatqa sozylǵan.
Babıshten keıin SPOLU koalıtsııasynyń ókili Petr Fıala (ODS), sonymen qatar onyń seriktesteri — Marketa Pekarova Adamova (TOP 09) jáne Marek Vybornyı (KDU-ČSL) prezıdentpen kezdesti. Jeksenbi kúngi kezdesýlerdi STAN partııasynyń tóraǵasy Vıt Rakýshan qorytyndylaıdy. «Pırattar» partııasynan Zdenek Grjıb, SDPG jetekshisi Tomıo Okamýra jáne «Avtomobılısty» partııasynyń ókili Petr Matsınka memleket basshysymen dúısenbi kúni júzdesedi.
2017–2021 jyldary Chehııa premer-mınıstri bolǵan Andreı Babısh Ýkraınaǵa kórsetiletin áskerı kómekti qysqartýdy jáne Eýropalyq Odaqtyń klımat pen kóshi-qon saıasatyn synǵa alýmen tanymal.
Sarapshylardyń aıtýynsha, el ishindegi ońshyl kúshter bıýdjet pen áleýmettik saıasat salasynda reformalar jasaýǵa jáne keıbir halyqaralyq mindettemelerdi qaıta qaraýǵa bara alady. Bul, ásirese, ómir súrý qunynyń ósýine alańdaǵan saılaýshylardyń qysymymen baılanysty.
Aıta ketsek, Chehııa — Qazaqstannyń Eýropadaǵy mańyzdy seriktesteriniń biri. Eki el arasyndaǵy saıası jáne ekonomıkalyq baılanystar nyǵaıyp keledi. Sondaı-aq Chehııada bilim alýdy tańdaǵan qazaqstandyq stýdentterdiń sany jyldan-jylǵa artyp otyr.