Chehııada jalǵyzbasty muqtaj ata-analardyń sany artyp keledi

ASTANA. KAZINFORM — Chehııanyń statıstıka basqarmasy ótken jyly balaly otbasylardyń ál-aýqatyna qatysty aýqymdy zertteý júrgizip, qazirgi jaǵdaıdyń nasharlaǵanyna alańdaýshylyq bildirip otyr, dep jazady AZERTADJ.

8 500 chehııalyq úı sharýashylyǵyn qamtyǵan bul zertteý nátıjesinde 2024 jyly balaly otbasylardyń 12%-y tabystyń jetkiliksizdigi máselesine tap bolǵany anyqtaldy. Salystyrmaly túrde aıtqanda, 2022 jyly bul kórsetkish 10%-dy quraǵan. Mundaǵy «tabysy boıynsha kedeılik» uǵymy — otbasylardyń aı saıynǵy tabysy Chehııadaǵy ortasha taza tabystyń 60%-ynan tómen bolýy.

Eń aýyr jaǵdaı — jalǵyzbasty ata-analar men úsh jáne odan da kóp balasy bar otbasylarda baıqalady. Birinshi jaǵdaıda 36,6% otbasy tabystyń jetkiliksizdigin bastan keshirse, ekinshi jaǵdaıda bul kórsetkish 23,6%-dy quraǵan. Arnaýly úkimettik emes uıymdar Chehııadaǵy jalǵyzbasty ata-analardyń jaǵdaıy birneshe jyldan beri jaqsarmaı kele jatqanyn atap ótip otyr.

Chehııa ǵylym akademııasynyń Sotsıologııalyq ınstıtýty men Ulttyq SYRI ınstıtýtynyń (áleýmettik-ekonomıkalyq aýrýlar men júıelik qaýipterdiń áserin zertteý jónindegi ulttyq ınstıtýt) mamandary COVID-19 pandemııasy kezinde 32 tolyq emes otbasyn baqylap, qazirgi kúrdeli jaǵdaıdyń sebebi jalǵyzbasty analardyń eńbek naryǵyndaǵy osaldyǵy men materıaldyq tapshylyǵyna baılanysty ekenin aıtty.

Zertteýler kórsetkendeı, mundaı otbasylarda jıi kezdesetin qıyndyqtardyń biri — azyq-túlik tapshylyǵy. Aqsha jetispegendikten, jalǵyzbasty analar tabys tabý úshin qan plazmasyn tapsyrý sııaqty amaldarǵa júginedi.

Al arnaýly úkimettik emes uıymdar memleket tarapynan beriletin áleýmettik kómektiń jetkiliksizdigin de synǵa alady.

Budan buryn Chehııada jaz aılarynda eń kóp jumysshy egin jınaý, suryptaý jáne eginge kútim jasaý jumystarynda jetispeıtinin jazǵan edik.