Chehııada Stoýnhendjden myń jyl buryn salynǵan kóne qurylys tabyldy
ASTANA. KAZINFORM – Arheologtar Chehııanyń Hleby eldi mekeni mańynan jasy 6500 jyldan asatyn alyp dóńgelek qurylys tapty. Ol áıgili Stoýnhendjden shamamen myń jyl buryn salynǵan, dep habarlaıdy BILD.
Dıametri shamamen 230 metr bolatyn keshen Ortalyq Chehııa ólkesinde ornalasqan jáne Ortalyq Eýropadaǵy osy tıptegi eń kóne qurylystardyń biri sanalady.
Qurylystyń jer betindegi bóligi saqtalmaǵan. Alaıda zertteýshiler tereńdigi 2,5 metrden asatyn ordyń izderin jáne ortalyqqa aparatyn 12 kireberisti anyqtady. Qazba jumystarynyń jetekshisi Petr Krıshtýftyń aıtýynsha, olardyń ornalasýy kezdeısoq emes jáne Kún men Aıdyń qozǵalysyn baqylaýmen baılanysty bolǵan.
Kireberisterdiń bir bóligi jazǵy jáne qysqy kún toqyraýy kezinde Kúnniń shyǵýy men batý núktelerine baǵyttalǵan. Qalǵandary shamamen ár 18 jyl saıyn qaıtalanatyn Aıdyń shetki ornalasý núktelerine sáıkes keledi.
– Dál osyndaı qaǵıdany Stoýnhendjdiń negizgi osinen de kóremiz. Endi bul qurylystyń da soǵan uqsas tásilmen jobalanǵanyn baıqap otyrmyz, – dedi Krıshtýf.
Keshenniń dinı mańyzy da bolǵan bolýy múmkin. Arheologtar ordyń ishinen janýarlardyń súıekterin, sonyń ishinde buqalardyń bas súıekteri men múıizderin tapqan. Olar ásirese kireberisterdiń mańynan kóp tabylǵan.
Zertteýshiler buqa múıizderi qaqpalardy bezendirý úshin paıdalanylǵan bolýy múmkin dep boljaıdy. Al buqa Eýropadaǵy alǵashqy eginshilik qaýymdary úshin kúsh pen qunarlylyqtyń sımvoly bolǵan.
Aıta keteıik, Polshada balmuzdaq satylǵan dámhana astynan 900 jyl burynǵy shirkeýdiń qaldyqtary tabyldy.
Al Mysyrda 2500 jyl burynǵy ǵıbadathananyń qaldyqtary tabyldy.
