Chehııada meıramhanadaǵy jarylystan 6 adam qaza tapty

ASTANA. KAZINFORM – Senbi kúni keshke Chehııanyń soltústik-batysyndaǵy Most qalasynda «U Kojota» meıramhanasynda gaz jarylyp, arty órtke ulasqan, dep habarlaıdy Kazinform tilshisi.

Qaıǵyly oqıǵa saldarynan alty adam qaza taýyp, segiz adam jaraqat alǵan.

Around Prague basylymynyń derekterine sáıkes jarylys gaz jylytqyshynyń meıramhana baqshasynda aýdarylýynan bolǵan.

Órt sóndirýshiler oqıǵa ornyna tez arada keldi, biraq olar kelgenshe ǵımarat órtke orandy. Órtti sóndirý kezinde birneshe propan-býtan ballondary jarylǵan kórinedi, qalǵandary ǵımarattan shyǵaryldy.

Tabıǵı apatpen kúreske 13 bólimsheden 63 órt sóndirýshi tartyldy. Órt túngi saǵat 1-ge deıin sóndirilgen. Alaıda órt sóndirý bólimshesi qyzmetkerleriniń biri jaraqat aldy.

Jarylys kezinde meıramhanada 20-ǵa jýyq qonaq bolǵan eken.

Aýa raıynyń qolaısyzdyǵy, atap aıtqanda qar men qatty aıaz órt sóndirýshilerge aıtarlyqtaı qıyndyq týyndatty. Osyǵan qaramastan, órt sóndirýshiler meıramhananyń dárethanasynda qulyptalyp qalǵan adamdy qutqara aldy. Aýyr jaǵdaıdaǵy jábirlenýshi birden aýrýhanaǵa jetkizildi. Qalǵan zardap shekkender Praga, Ýstı-nad-Labem jáne Most klınıkalaryna jetkizildi.

Chehııanyń ishki ister mınıstri Vıt Rakýshan jeksenbi kúni tańerteń qaıǵyly oqıǵa ornyna baryp, kóńil aıtty. Most qalasynyń meri Marek Grol bul oqıǵany qalanyń qazirgi tarıhyndaǵy eń nashar dep atady.

Buǵan deıin habarlanǵandaı, Chehııada eki poıyz soqtyǵysyp, adamdar qaza tapty.