Chehııada kómir shahtasynda jarylys bolyp, 13 adam qaza tapty
PRAGA. QazAqparat - Cheh Respýblıkasynyń soltústik-shyǵysynda ornalasqan Karvın qalasyndaǵy SSM kómir shahtasynda metan jarylyp, saldarynan 13 adam qaza tapty. Onyń 11-i - polshalyqtar bolsa, ekeýi - Chehııa azamaty, dep habarlaıdy QazAqparat TASS agenttigine silteme jasap.
Jarylys beısenbi kúni Ortalyq Eýropa ýaqytymen 17:17-de 880 m tereńdikte bolǵan.
«Jarylys saldarynan 13 adam - 11 polıak jáne eki cheh qaza tapty. Apatqa metannyń órtenýi sebep bolǵan. Shahterler jumys istep jatqan birneshe ýchaskede jynystar opyrylyp túsken», - dep málimdedi shahta dırektsııasynyń ókili Ivo Chelehovskıı.
Jarylys kezinde jaraqat alǵan bir shahter jergilikti aýrýhanalardyń birinde hal ústinde jatyr. Aýrýhanaǵa jetkizilgen taǵy eki shahterdiń jaǵdaıy asa aýyr emes. Jalpy, apat saldarynan 10 shahter zardap shekken, sonyń jeteýine ambýlatorlyq em-dom jasalyp jatyr.
SSM shahtasynda bolǵan qaıǵyly oqıǵa - sońǵy jyldarda Chehııada bolǵan apattardyń ishindegi eń irisi. Cheh-polıak shekarasyna jaqyn mańda ornalasqan shahtaǵa Chehııa jáne Polshanyń premer-mınıstrleri Andreı Babısh men Mateýsh Moravetskıı attanǵan.
Polsha Prezıdenti Andjeı Dýda Twitter-de opat bolǵan 11 polıak kenshisiniń jaqyndary men týystaryna kóńil aıtty.
Foto: EPA
