Chehııada qarý-jaraqqa degen suranys artty

ASTANA. KAZINFORM — Chehııada azamattardyń atys qarýyna degen qyzyǵýshylyǵy kúrt ósti, dep habarlaıdy AZERTADJ.

Eldiń Іshki ister mınıstrliginiń málimetterine sáıkes, azamattarda tirkelgen atys qarýynyń sany 1,1 mıllıonǵa jýyqtady. Ásirese, «floberovkalar» dep atalatyn qarýlarǵa suranys artty — olardyń sany bir jylda 50%-ǵa kóbeıdi.

Bul ósimniń sebebi — 2026 jyldyń 1 qańtarynan bastap kúshine enetin atys qarýy men oq-dáriler týraly jańartylǵan zań. Osydan keıin flober patrondaryna arnalǵan qarýlar qatań baqylaý kategorııasyna engizilip, ony satyp alý úshin lıtsenzııa qajet bolady. Alaıda jańa ereje tek bolashaqta satyp alynatyn qarýlarǵa qatysty, buryn alynǵan qarýlar óz ıelerinde qalady.

Zań qarý-jaraq saýdasyn qatań baqylaýǵa alýdy kózdeıdi. Saýdagerler kúmándi satyp alýshylar týraly habarlaýǵa mindetti bolady — mysaly, ruqsatsyz qarý alýǵa árekettenetin, beıqam nemese kúızelis jaǵdaıynda turǵan klıentter týraly. Sondaı-aq, qaýip tónip turǵan jaǵdaıda qarý tárkileý múmkindigi qarastyrylǵan. Budan bólek, medıtsınalyq kýálandyrý merzimi 10 jyldan 5 jylǵa qysqartylady.

2023 jyldyń sońynda Pragada Karlov ýnıversıtetinde stýdenttiń jasaǵan qarýly shabýyly zańnyń qatańdatylýyna sebep boldy. Sol kezde 14 adam qaza taýyp, 25 adam jaraqat alǵan bolatyn.

Buǵan deıin Chehııada aptap ystyqtan qoımadaǵy oq-dáriler jaryla bastaǵanyn jazǵanbyz.