Chehııada Elbasynyń jańǵyrtý jónindegi reformalary tanystyryldy
ASTANA. QazAqparat - Qazaqstan Prezıdenti Nursultan Nazarbaevtyń jańǵyrý reformalary Pragada jumysyn bastaǵan «EQYU aýmaǵynda ınnovatsııa, adam kapıtalyn damytý, qoǵamdyq jáne korporatıvti jaqsy basqarý arqyly ekonomıkalyq damý men qaýipsizdikti nyǵaıtý» taqyrybyna arnalǵan 26-shy EQYU Ekonomıka jáne qorshaǵan orta forýmy barysynda tanystyryldy. Bul týraly QazAqparat QR Syrtqy ister mınıstrliginiń baspasóz qyzmetine silteme jasap habarlaıdy.
Forýmnyń qorytyndy otyrysy bıyl Vena jáne Venetsııada bolǵan daıyndyq jınalystarynyń negizinde uıymdastyryldy jáne is-sharanyń sessııalary barysynda úkimet, jeke sektor, azamattyq qoǵam ókilderimen qatar halyqaralyq sarapshylar tsıfrlyq ekonomıka dáýirindegi múmkindikter, bıznes sektorynda tsıfrlyq qaýipsizdik, memlekettik jáne korporatıvti jaqsy basqarýda tsıfrlyq ınnovatsııalar, tsıfrlyq dáýirde adam kapıtaly men ekonomıkalyq ózara baılanystyqty ilgeriletý máseleleri talqylandy.
Osynyń negizinde bıyl Mılanda josparlanǵan EQYU Syrtqy ister mınıstrler keńesinde ekonomıka jáne qorshaǵan orta taqyrybyna arnalǵan sheshimderdiń jobalaryn qabyldaý múmkindigi qarastyryldy.
Forýmnyń ashylý sessııasynda Memleket basshysynyń «Tórtinshi ónerkásiptik revolıýtsııa jaǵdaıyndaǵy damýdyń jańa múmkindikteri» joldaýyndaǵy basymdyqtaryna Qazaqstan Respýblıkasynyń Vena qalasyndaǵy halyqaralyq uıymdar janyndaǵy Turaqty Ókili - EQYU Ekonomıka jáne ekologııa komıtetiniń tóraǵasy Qaırat Sarybaı nazar aýdardy.
Italııa Syrtqy ister jáne halyqaralyq yntymaqtastyq mınıstriniń orynbasary Djýlıelmo Pıkkı tsıfrlandyrý EQYU úshin jańa taqyryp bolǵanyna qaramastan, uıym osy taqyryptyń tóńireginde ózin jandandyra alatynyn málimdedi. Sonymen birge, qazirgi tańda tsıfrlandyrý bıznestiń damýyna ári jańa deńgeıge shyǵýyna oń yqpal etip jatqanyn jáne jańa jumys oryndarynyń ashylýyna sebepker bolǵanyn atap ótti. Sondaı-aq tsıfrlandyrýdan týyndaıtyn qaýip-qaterlerge baılanysty uıymǵa múshe elderdiń keńese birlese jumys júrgizýiniń mańyzdylyǵy men qajettiligine toqtaldy.
Chehııa syrtqy ister mınıstriniń orynbasary Tomash Petrıchek EQYU Ekonomıka jáne ekologııa forýmynyń ózara senim jáne dıalog ornatý turǵysynan erekshe platforma bolǵanyn jetkizdi.
