Chehııada el tarıhyndaǵy eń iri narazylyq aktsııasy ótedi
Chehııa kásipodaqtary búgin, 27 qarashaǵa josparlaǵan narazylyq aktsııasyna 1 mıllıonǵa jýyq jumysshysy bar júzdegen kásiporyn men fırma qatysady. Sondaı-aq mektepke deıingi bilim berý uıymdarynyń 70% qyzmetkeri narazylyq aktsııasyna shyǵady. Kazinform bul týraly Rıa Novostı basylymyna silteme jasap habarlaıdy.
Chehııa-Moravııa kásipodaqtar konfederatsııasynyń basshysy Iozef Strshedýly sózinshe, bul Chehııa tarıhyndaǵy eń iri narazylyq bolmaq.
«Qolda bar derekter boıynsha, 27 qarashaǵa josparlanǵan aktsııa Chehııada ótken eń iri qarsylyq sharasy bolmaq. Oǵan kásiporyn men fırmalardyń 1 mıllıonǵa jýyq jumysshysy, sonymen qatar bastaýysh jáne orta mektep qyzmetkeriniń 70%-y qatysady. Maqsaty – respýblıka úkimetin qoǵamda ne bolyp jatqany týraly oılanýǵa májbúrleý. Eger olar (mınıstrler) mundaı aktsııany baıqamaı, qutylyp ketýge bolady dep oılasa, qoǵamnyń kóńil kúıi tipti nasharlaýy múmkin», - dep málim etti jýrnalısterge eldegi eń iri kásipodaqtar birlestiginiń kóshbasshysy.
Olardyń jaqynda parlament maquldap, prezıdent qol qoıǵan memleket qarjysyn ońaltýǵa arnalǵan sharalarǵa, onyń ishinde memlekettik dotatsııany tómendetý, birqatar salyq jeńildikterin joıý, keı taýar men qyzmet túrlerine QQS arttyrý, zeınetaqy tóleý sharttaryn ózgertý jáne basqa da qatań sharalarǵa kóńili tolmaıdy. Kásipodaqtar men oppozıtsııanyń pikirinshe, reformalar ınflıatsııanyń kóterilýine ákep soǵady, ekonomıkanyń ósimine keri áser etip, azamattardyń ómir sapasyn tómendetedi.
Sondaı-aq olar mınıstrler kabıneti músheleri áleýmettik dıalogqa kelgisi kelmeıtinin atap ótti.
Narazylyq jospary boıynsha, búgin kóptegen kásiporyn óndiristik protsesti keminde bir saǵatqa toqtatady. Al óndiris tártibi oǵan múmkindik bermeıtin kásiporyn jumysshylary narazylyqqa shyqqandardy qoldap plakattar iledi. Aktsııaǵa kólik, temirjolshylar, bilim berý, densaýlyq saqtaý, mádenıet, tamaq jáne aǵash óńdeý salasy jumysshylary qatysady. Sondaı-aq aktsııaǵa Qarttar isi boıynsha keńes pen Múgedekter isi boıynsha keńes qoldaý kórsetti.
Mıtıngi men sherýler respýblıkanyń barlyq óńirinde ótedi.
