Chehııada el namysyn qorǵaıtyn atletter kimder
ASTANA. QazAqparat - Erteń, 7 sáýirde Chehııanyń Podebrady qalasynda sporttyq júristen dástúrli halyqaralyq jarys bastalady, dep habarlaıdy QazAqparat.
QR Jeńil atletıka federatsııasynyń resmı saıty jarysqa Qazaqstan sportshylary ártúrli jas kategorııasynda óner kórsetetini týraly habarlady.
Atap aıtar bolsaq, Vıtalıı Terehın - erler arasyndaǵy 20 shaqyrymdyq qashyqtyqta jarysady. Valentına Zalevskaıa men Ekaterına Shlykova jasóspirimder arasyndaǵy 10 shaqyrymdyq básekege qatysady. Sondaı-aq 2001 jyldan beri qaraı týǵan balalar arasynda Krıstına Morozovaǵa senim artylyp otyr (5 shaqyrym).
Morozova Soltústik Qazaqstan oblysynyń týmasy. Qalǵan úsheýi Almaty qalasynan. Byltyr Podobredyǵa Terehın men Zalevskaıa barǵan bolatyn. Ol kezde Terehın 49 sportshynyń arasynan 16-oryn alǵan. Onyń ústine 20 shaqyrymdy 1 saǵat 28 mınýt 6 sekýndta júrip ótip, sport sheberi normatıvin oryndaǵan edi.
Aıta keteıik, byltyr Chehııada erler arasynda Vıtalıı Terehınnen bólek, Zamanbek Bababek óner kórsetken.
foto:kazathletics.kz
