Chehııada eki jolaýshylar poıyzy soqtyǵysyp qaldy
ASTANA. QazAqparat - Chehııanyń Brno-Plzen temirjol jelisinde eki jolaýshylar poıyzy soqtyǵysty. Bul týraly qutqarý qyzmetiniń ókili Lenka Ptachkova habarlady.
Qolda bar málimetter boıynsha, oqıǵa saldarynan jeti adam aýyr jaraqattanyp, taǵy birneshe ondaǵan jolaýshy jeńil jaraqattar alǵan.
Habarlanyp otyrǵandaı, Plzenge jol tartqan quramnyń sońǵy vagony ázirge belgisiz sebeptermen relsterden shyǵyp, temirjol joldaryna aýdaryldy. Sol kezde vagonǵa qarama-qarsy baǵytta kele jatqan basqa jolaýshylar poıyzy soǵyldy.
Temirjoldyń atalǵan baǵyttaǵy ýchaskesinde qozǵalys toqtatyldy. Apat sebepterin tergeý júrgizilip jatyr. Jolaýshylar qaýipsiz jerge kóshirildi, dep habarlaıdy sheteldik BAQ.
