Chehııada eki poıyz soqtyǵysyp, ondaǵan adam jaraqattandy, ekeýi mert boldy

PRAGA. QazAqparat – Chehııanyń batysynda, Domajlıtse mańyndaǵy Mılavtse eldi mekeninde eki jolaýshy poıyzy soqtyǵysty. Polıtsııa ondaǵan adamnyń jaraqattanyp, eki adamnyń mert bolǵanyn rastady, dep habarlaıdy QazAqparat BBC-ge silteme jasap.

Chehııa televızııasynyń málimetinshe, Praga men Mıýnhen arasynda júretin «Batys ekspresi» men taǵy bir jolaýshy poıyzy soqtyǵysqan. Apat jergilikti ýaqyt boıynsha tańǵy 8-den óte bolǵan.

ChKT agenttiginiń málimetine sáıkes, zardap shekkenderdiń kem degende jeteýiniń jaǵdaıy aýyr, 31 adamnyń jaraqattary odan jeńilirek.

CT24zive telearnasynyń dereginshe, Domajlıtsedegi aýrýhana temirjol apatynan zardap shekkenderge oryn bosatý úshin barlyq josparlanǵan otalardy keıinge qaldyrǵan.