Chehııada buryn «elıtaǵa arnalǵan» qytaı avtokólikteri qurastyrylady

ASTANA. KAZINFORM — 1959 jyly negizi qalanǵan Qytaıdyń eń kóne avtokólik óndirýshisi Hongqi bastapqyda tek joǵary laýazymdy memlekettik sheneýnikter men partııa qyzmetkerlerine arnalǵan avtokólikterdi ǵana shyǵaratyn, dep habarlaıdy AZERTADJ.

Endi bul kompanııa óz ónimderin jaqyn arada Chehııa Respýblıkasyna jetkize bastaıdy.

Agenttik habarlaýynsha, muny cheh naryǵyna arnalǵan bólshekterdi ımporttap, jergilikti avtozaýytta qurastyrýdy júzege asyratyn slovakııalyq Plastonic kompanııasy málimdegen.

— Bizge belgili bolǵandaı, Hongqi álemdik lıýks avtokólikter naryǵynda óz ornyn alýdy kózdep otyr jáne Rolls-Royce, Bentley men Mercedes-Maybach sııaqty áıgili brendtermen básekeles bolǵysy keledi. Bul — shynymen de úlken ári batyl maqsat. Biz osy úderistiń bir bóligi bolýǵa jáne bul avtokólik óndirýshini bizdiń aımaqta tanystyrýǵa múmkindik alǵanymyzǵa qýanyshtymyz», — dedi Plastonic kompanııasynyń bas dırektory Branıslav Kotsper baspasóz habarlamasynda.

Onyń sózinshe, qazirdiń ózinde Chehııada Hongqi-diń eki dılerlik ortalyǵy, al Slovakııada altaýy salynyp jatyr.

Cheh naryǵyna alǵash bolyp 640 shaqyrymnan astam qashyqtyqty júrip ótetin EH7 elektrlik sedany men 500 shaqyrymnan astam júretin EHS7 elektrlik krossoveri usynylady. EH7 sedanynyń bastapqy baǵasy — 1 349 900 cheh krony (shamamen 54 400 eýro), al EHS7 krossoveriniń baǵasy 1 479 900 kronyna (shamamen 59 600 eýro) teń.

Aıta keteıik, bul brendtiń óndirisi 1981 jyly toqtaǵan bolatyn, alaıda 1990 jyldardyń ortasynda qaıta jandandyryldy. Hongqi brendi FAW kontserniniń quramyna kiredi. Ótken jyly kompanııa Eýropa naryǵyna tolyqqandy shyǵatynyn jáne aldaǵy 5 jyl ishinde 12 jańa úlgini usynatynyn jarııalaǵan.

Hongqi ataýy qytaı tilinen aýdarǵanda «Qyzyl tý» degendi bildiredi, al onyń durys aıtylýy — «Honchı» nemese «Hongshı».

Buǵan deıin Tynyq muhıtynda bortynda 3 myń kólik bar keme sýǵa batyp ketkenin jazǵan edik. Kemeniń bortynda Meksıka naryǵyna arnalǵan qytaılyq kólikter bolǵan kórinedi.