Chehııada baǵa ósimi jańa rekord ornatty

ASTANA. KAZINFORM — Qazan aıynda Chehııada tutyný baǵalary jyldyq esepte 2,5 paıyzǵa ósti. Chehııalyq statıstıka basqarmasynyń derekteri boıynsha, qyrkúıekte ınflıatsııa 2,3 paıyzdy quraǵan, dep habarlaıdy AZERTADJ

Dnes basylymynyń málimetinshe, baǵanyń kóterilýiniń negizgi sebebi — azyq-túlik pen alkogolsiz sýsyndar. Bir aı ishinde olardyń baǵasy 1,1 paıyzǵa, al jyldyq esepte 3,6 paıyzǵa ósken. Ásirese kofe baǵasy shamamen tórtten birge qymbattap, shokolad pen kondıterlik ónimder 18 paıyzǵa kóterilgen. Sút, irimshik jáne jumyrtqanyń baǵasy shamamen 8 paıyzǵa, et 6 paıyzdan astam, nan men dándi daqyldar 3 paıyzǵa qymbattaǵan. Alkogoldik sýsyndar 4 paıyzǵa, temeki 6 paıyzǵa qymbattaǵan.

Tek azyq-túlik qana emes, turǵyn úı men qyzmet túrleri de bıýdjettiń aýyrtpalyǵyna áser etedi. Páter jaldaý 5,8 paıyzǵa, sý 4,2 paıyzǵa, káriz qyzmeti 3,7 paıyzǵa, jylytý jáne ystyq sý 1,8 paıyzǵa qymbattaǵan. Bul rette elektr energııasy 3,6 paıyzǵa, gaz 7,9 paıyzǵa, qatty otyn 2,6 paıyzǵa arzandaǵan.

Qoǵamdyq tamaqtaný jáne qonaqúıler qyzmetteri de qymbattaǵan: meıramhanalar men kafe 4,4 paıyzǵa, qonaqúılerde turý quny 6,6 paıyzǵa ósken. Al kıim baǵasy 1,6 paıyzǵa, aıaq kıim 3,3 paıyzǵa arzandaǵan.

Ekonomısterdiń aıtýynsha, energııa baǵasy arzandaǵanyna qaramastan, azyq-túlik pen turǵyn úı baǵasynyń ósýi otbasylardyń bıýdjetin áli de qysymǵa ushyratyp otyr.

Budan buryn habarlanǵandaı, Chehııada 2025 jyldyń alǵashqy alty aıynda halyq sany 27 myńnan astam adamǵa azaıdy.